Технологијата функционира така што се анализираат хемикалии од здивот на пациентот, кои би можеле да дадат одговор на прашањето од што страда пациентот и дали има респираторни проблеми. Тестовите успеале да откријат траги на COVID-19 во хемикалиите, а потоа истото било потврдено и со традиционален и поинвазивен тест на брис од грло и нос
Раните резултати од истражувањето на новиот тест за коронавирус отвораат можност за „брзо препознавање“ на болеста, резултати кои би се добиле за неколку секунди, наместо за неколку часови. Најновата британска студија покажува дека со методот за анализа на здивот, развиен во Велс, би можело веднаш да се дознае дали некое лице е заразено со коронавирус.
Резултатите од истражувањето се објавени во списанието „LANCET“ по малото испитување на новиот тест во кое биле вклучени пациенти во Шкотска и Германија.
Одговорните од компанијата „Imspex Diagnostics“ велат дека нивните уреди би можеле да бидат подготвени за употреба за шест месеци, доколку успеат да обезбедат финансиски средства навреме.
„Мислам дека овде имаме голем потенцијал“, изјави основачот и извршен директор на компанијата Санти Домингез, додавајќи дека таков брз тест би можел да се применува и надвор од болничката средина, на пример, во авиони или други транспортни средства.
„Примерокот може да се земе многу брзо, тестот е неинвазивен и не е потребно посебно обучен персонал за да се соберат примероците – а само неколку минути подоцна го добивате резултатот“, изјави Домингез.
Првично, оваа технологија се користела за развој на тестови за откривање на болести како рак на белите дробови и за брзо разликување на бактериски и вирусни респираторни болести, но поради пандемијата на коронавирус, компанијата одлучила да ги искористи своите дијагностички напори и за откривање на оваа болест, пишува Би-Би-Си.
Резултатите од истражувањето се објавени во списанието „LANCET“ по испитувањето на новиот тест во кое биле вклучени пациенти од Шкотска и Германија
Досега се спроведени две испитувања на новата технологија на хоспитализирани пациенти во Единбург и во Дортмунд, Германија. Реализирани се на самиот почеток на пандемијата.
Технологијата функционира така што се анализираат хемикалии од здивот на пациентот, кои би можеле да дадат одговор на прашањето од што страда пациентот и дали има респираторни проблеми. Тестовите успеале да откријат траги на COVID-19 во хемикалиите, а потоа истото било потврдено и со традиционален и поинвазивен тест на брис од грло и нос.
Во 80 проценти од случаите, ваквото тестирање успешно предвидело дали пациентот страда од COVID-19, при што тестот ја разликувал оваа болест од другите, кои со себе носат проблеми со дишењето, како што е астма или бактериска пневмонија.
Во студијата спроведена меѓу хоспитализираните пациенти во Единбург, научниците идентификувале хемиски соединенија кои имале „значајна можност да ја предвидат“ сериозноста на инфекцијата со коронавирус.
Од британската компанија велат дека тие веруваат дека ваквата техника може да укаже на тоа кои се најзагрозените пациенти.
Научниците заклучиле: „Доколку се покаже веродостојна, оваа технологија нуди можност за брзо откривање на COVID-19 во одделенијата за итни случаи или примарната здравствена заштита, што ќе придонесе за подобра работа со пациентите и безбедност на здравствениот персонал“.
„Развојот и одобрувањето на ваквиот пристап може да овозможи брза дијагностика на COVID-19 во претстојните сезони на грип“, додаваат тие.
-
Пол Томас, од одделот за хемија на „Loughborough University“, рече дека резултатите се „многу охрабрувачки“, но како што додаде, сепак, се работи за студија од мали размери бидејќи во неа учествувале околу стотина пациенти
Компанијата што ја произведува опремата вели дека технологијата треба да се усоврши пред да се смета за подготвена и безбедна за употреба во секојдневните ситуации, без оглед дали станува збор за болници или за други места, како што се аеродромите.
„Со вистинска поддршка би можеле да излеземе на пазарот и за помалку од половина година“, рече Домингез, велејќи дека ова откритие сега е приоритет на компанијата. (Би-Би-Си)
