Во Англија моментално се спроведува тестирање на нов брз крвен тест кој би можел да им помогне на лекарите да препознаат сериозни инфекции кај децата за само 15 минути.
Овој тест значително може да ја забрза дијагнозата на болести како сепса или менингитис, бидејќи покажува дали станува збор за бактериска или вирусна инфекција – што е клучно за одлуката дали детето веднаш треба да добие антибиотик.
За разлика од вообичаените крвни анализи кои се испитуваат во лабораторија и резултатите се чекаат часови, овој тест дава речиси моментален увид во состојбата на детето. Лекарите кои учествуваат во тестирањето велат дека веќе забележале придобивки: едно дете со менингококен менингитис добило терапија многу порано, а друго со сепса веднаш добило антибиотик.
Технологијата моментално се тестира во три болници – во Ливерпул, Лондон и Њукасл. Професорката Енитан Карол од Универзитетот во Ливерпул, која го води проектот, објаснува: „Многу бебиња и деца доаѓаат во болница со покачена температура. Овој тест може да им помогне на лекарите брзо да утврдат дали станува збор за безопасна вирусна инфекција како настинка или за сериозно состојба која бара итна терапија.“
Целта на студијата е да се види дали тестот може да помогне во донесување побрзи и попрецизни одлуки, но и да се намали непотребната употреба на антибиотици – што би било корисно и за децата и за целиот здравствен систем.
Д-р Шарлот Дуранд од детската болница Алдер Хеј верува дека овој тест може „значително да го промени начинот на кој се третираат децата во итните служби“.
Д-р Рон Даниелс додава дека тестот буквално може да спаси животи. Според податоците, околу 500 деца годишно во Велика Британија умираат од инфекции, а во дури 40% од случаите утврдено е дека терапијата не била оптимална.
„Правилната одлука за тоа кога и кому да се дадат антибиотици може да значи разлика помеѓу живот и смрт“, истакнува Даниелс. „Сепсата и тешките инфекции се еден од најголемите предизвици со кои се соочува здравствениот систем, а паметната примена на антибиотици – давање на оние кои навистина им се потребни и избегнување каде што не се – никогаш не била поважна.“
Иако студијата моментално се спроведува кај деца, претходните истражувања покажуваат дека тестот би можел да биде подеднакво корисен и кај возрасните.
