Меѓу децата владее нова епидемија, тврдат стручњаците. Шестогодишни деца се соочуваат со очни болести кои досега беа карактеристични за лица во постара возраст. Станува збор за болест на суво око, која се јавува кај децата кои премногу време минуваат гледајќи во екрани, од телевизија, преку паметни телефони до таблети.
Последиците на болеста на суво око се јавуваат кога солзите не можат да обезбедат соодветно “подмачкување“ на очите.
Оваа болест обично ги погодува луѓето на возраст меѓу 50 до 60 години, а доколку не се лекува, може да биде исклучително болна со симптоми како што се уморни, црвени и чувствителни очи. Заболените го споредуваат чувството со она кога сечкаат кромид, односно со постојано чувство на пецкање.
Офталмологот д-р Сара Фарант, која е експерт за суво око, вели дека се почесто среќава деца од основно училиште кои со ваква состојба доаѓаат на нејзината ординација. За тоа делумно вели дека е виновно времето кое се поминува пред екрани, бидејќи гледањето во екран драматично ја намалува стапката на трепкање.
“Кога ја отворив клиниката пред 15 години, немаше ниту едно дете кое се појави со таква состојба. Меѓутоа, во последните пет или шест години гледам се повеќе деца со болест на суво око. Мојот најмлад пациент имаше шест години, што порано беше незамисливо“, објаснува д-р Фарант.
Ако болеста на суво око не се лекува, може да доведе до неповратно оштетување на жлездите во очните капаци кои произведуваат солзи.
