![читање](https://pedijatar.mk/wp-content/uploads/2023/08/chitane-696x392.jpeg)
Децата кои од задоволство читаат 12 часа неделно постигнуваат подобри резултати на когнитивните тестови и имаат подобро ментално здравје, покажа истражувањето објавено во списанието Psychological Medicine.
Истражувачите од Универзитетот Кембриџ и Универзитетот Фудан ги проучувале податоците од Студијата за когнитивен развој на мозокот кај адолесцентите, долгорочен проект кој го следи развојот на мозокот и здравјето на децата во САД.
Тимот анализирал клинички интервјуа, когнитивни тестови, ментални и бихејвиорални проценки и скенирања на мозокот на 10.000 американски адолесценти. Потоа ги споредил оние кои почнале да читаат од задоволство на возраст од 2 до 9 години со оние кои почнале да читаат подоцна во животот или воопшто никогаш не почнале.
Оние кои почнале со рекреативно читање на рана возраст имале подобри резултати во однос на вербалното учење, помнење, развојот на говорот и општите академски достигнувања од нивните врсници кои не читале книги од забава.
Читањето е поврзано со важни фактори во развојот
Децата кои читаат од задоволство имале подобро ментално здравје, покажувале помалку знаци на депресија или стрес и имале помалку проблеми во однесувањето, откриле истражувачите. Поминувале помалку време гледајќи во екраните и подолго спиеле.
Гледајќи ги снимките од мозоците на децата, истражувачите откриле дека оние кои читаат од задоволство имале поголема површина и волумен на мозокот, вклучувајќи ги и региите поврзани со когнитивните функции.
Сепак, повеќе не е секогаш подобро. Децата кои читале повеќе од 12 часа неделно доживеале пад на когнитивните способности, што може да биде резултат на премногу време поминато во седечка положба.
„Читањето не е само пријатно искуство – широко е прифатено дека го стимулира размислувањето и креативноста, ја зголемува емпатијата и го намалува стресот“, изјави Барбара Сахакијан, професорка на одделот за психијатрија на Универзитетот Кембриџ.
„Покрај тоа, најдовме значајни докази дека тоа е поврзано со важни развојни фактори кај децата – подобрување на нивната когниција, ментално здравје и структура на мозокот, кои се камен-темелник за идното учење и благосостојба“, додава таа.