Родителите често ги бараат првите знаци на интелигенција кај своите бебиња, без разлика дали станува збор за гугање, мавтање, насмевнување или препознавање познато лице. Иако ваквите моменти се претежно изрази на родителска љубов и гордост, ново истражување покажува дека може да има вистина во тоа.
Научниците од Универзитетот Колорадо Болдер, дошле до заклучок дека возрасната интелигенција може да се претпостави уште од денечкиот период. Врз основа на податоци собирани со децении, утврдиле дека способноста на една личност да постигне високи резултати на когнитивните тестови може да се предвиди уште од седумиот месец од животот.
Долгорочна студија на близнаци
Во студијата учествуваа 500 семејства со близнаци, и еднојајчани и двојајчани. Децата биле следени од 7 месеци до триесеттите години на животот. Целта била да се разбере како генетиката и околината влијаат врз развојот на интелигенцијата.
Споредувајќи еднојајчани близнаци, кои ги делат сите свои гени, и двојајчани близнаци, кои ги делат околу половина од своите гени, истражувачите биле во можност да проценат колку од когнитивните способности се должат на наследни фактори, а колку на фактори на животната средина.
Според д-р Даниел Густавсон, водечки автор на студијата, заедничката околина вклучува сè што го опкружува детето, вклучувајќи го домот, соседството, училиштето и социјалниот контекст.
Рани знаци што можат да го откријат идниот коефициент на интелигенција
Во првите години од животот, особено пред тригодишна возраст, околината игра важна улога и може да влијае на интелигенцијата подоцна во животот. Раните тестови вклучувале мерење на времето што детето го поминува гледајќи нов објект во споредба со познат, следење на предметот со поглед, вокализации, расположение и распон на внимание, а исто така ги користеле и добро познатите Бејлиеви развојни скали.
Иако раните тестови предвидуваа само мал дел од идната интелигенција, по тригодишна возраст можноста за предвидување значително се зголемува, а помеѓу седум и шеснаесет години влијанието на генетските фактори станува уште поизразено.
Интелигенцијата не е непроменлива
И покрај наследната компонента, експертите нагласуваат дека интелигенцијата не е фиксна или непроменлива. Децата можат да напредуваат и да се развиваат без оглед на првичните резултати.
