Податоците кои ги објави УНИЦЕФ покажуваат дека скоро третина од децата во светот се изложени на ризик од контакт со токсични концентрации на олово.
Новите откритија се засноваат на податоците добиени од анализата на примероци од крв собрани од десетици илјади деца од целиот свет
Станува збор за количини на олово кои кај децата може да предизвикаат неповратни оштетувања, особено кај деца под пет години. Повеќето од 800 милиони деца изложени на овој ризик живеат во средно и слабо развиени земји, претежно во Азија и Африка.
Главните извори на загадувањето се нерециклирани батерии и акумулатори, електронски отпад, бои и загадување настанато со работа на рудниците.
Новите откритија се засноваат на податоците добиени од анализата на примероци од крв собрани од десетици илјади деца од целиот свет.
Зошто се децата загрозени?
Експертите велат дека внесот на храна, течности и воздух кај децата е и до пет пати поголем од оној кај возрасните, доколку се спореди со телесната тежина, пишува Би-би-си.
„Тоа значи дека тие можат да апсорбираат повеќе од овој моќен невротоксин доколку протекол во земјата и водата или се раширил низ воздухот“, се вели во извештајот.
Бебињата и децата помлади од пет години се изложени на поголем ризик, се вели во документот, затоа што нивниот мозок може да биде оштетен пред целосно да се развие, што доведува до доживотни невролошки, когнитивни и физички проблеми.
Оловото е силен невротоксин, кој дури и кога сте изложени на ниско ниво на олово, е поврзан со послаби резултати на тестовите за интелигенција, пократко внимание и потенцијално насилно, па дури и криминално однесување подоцна во животот.
