Мајчинството на постара возраст има предности во однос на искуството и емоционалната подготвеност, но може да донесе и низа компликации и одредени здравствени ризици и за мајката и за детето. И покрај тоа, денес се повеќе жени одлучуваат да станат мајки на подоцнежна возраст.
Вистина е дека со годините станува потешко да се забремени. Причината лежи и во тоа што жените се раѓаат со фиксен број на јајце клетки, чиј број се намалува со возраста. Покрај тоа, бременоста над 35-годишна возраст доаѓа со некои дополнителни ризици од компликации како хипертензија, дијабетес или хромозомски абнормалности кај новороденчињата, пренесува Times of India.
Од наведените причини, на жените често им се советува да забременат порано во животот. Но, добрата вест е дека неодамнешни студии сугерираат дека бременоста подоцна во животот има бројни предности, а една од нив е тоа што постарите мајки можат подобро да ги воспитуваат своите деца.
Во последните две децении е намален бројот на жени кои станале мајки во своите дваесетти години. Се повеќе жени одлучуваат да имаат деца подоцна во животот, а најчести причини се градењето кариера и подоцна стапувањето во брак. Студија спроведена на Факултетот за бизнис и општествени науки на Универзитетот Архус во Данска покажала дека децата на жените кои родиле по 35-годишна возраст имаат некои дополнителни предности.
Споменатата студија сугерира дека постарите мајки не се толку строги во однос на наметнување физичка и вербална дисциплина на нивните деца на возраст меѓу 7 и 11 години. Како резултат на тоа, децата од оваа возрасна група покажале помалку потешкотии во однесувањето и помалку социјални и емоционални тешкотии. Истата студија покажала и дека постарите мајки имаат подобар и постабилен однос со своите деца. Дополнително, нивото на зрелост на овие жени им олеснува да го надминат стресот за време на бременоста и да одржуваат позитивен став во воспитувањето на децата.
Со текот на годините, луѓето стануваат подобри во справувањето со емоционалните и менталните предизвици, така што тие се поспособни да се справат со различни предизвикувачки ситуации и да ги водат своите деца на подобар начин. Истражувањето наведува и дека постарите мајки на децата им обезбедуваат позитивна психосоцијална средина која им помага да бидат оптимисти во животот.
