Педесет и девет проценти од возрасните и едно од три деца во Европа или се со прекумерна тежина или се дебели. Ова се алармантни резултати објавени во новиот регионален извештај на СЗО за Европа, кој укажува дека стапката на дебелина добива епидемиски размери.
Ниту една земја во европскиот регион моментално не е на пат да го запре порастот на дебелината до 2025 година. Претходните студии од некои земји покажаа дека прекумерната тежина или дебелина се зголемени кај децата и тинејџерите особено за време на Ковид-19 пандемијата.
Во својот извештај, СЗО ги означи апликациите за достава на оброци како можни виновници кои придонесуваат за проблемот со дебелината, велејќи дека тие можат да поттикнат „седечко однесување“. Пандемијата ја забрза употребата на овие апликации бидејќи на луѓето им беше препорачано да останат дома.
Дебелината и прекумерната тежина се одговорни за повеќе од 1,2 милиони смртни случаи во регионот секоја година, се вели во извештајот, нагласувајќи дека државите треба да посветат максимално внимание и да реагираат.
Дебелината стои зад најмалку 13 различни видови на рак и веројатно директно предизвикува најмалку 200.000 нови случаи на рак секоја година во регионот. Според извештајот на СЗО, се предвидува дека дебелината ќе го надмине пушењето во некои земји како водечки ризик фактор за рак што може да се спречи во наредните децении, пренесува РТС.
