„Ригорозното клиничко тестирање потребно за утврдување на безбедноста и ефикасноста на вакцината може да потрае некое време пред лиценцираната вакцина против SARS-CoV-2 да биде достапна за пошироката јавност“, истакна д-р Фаучи
Д-р Ентони Фаучи, централна фигура во кризниот штаб на Белата куќа за коронавирусот, вели дека пронаоѓањето на вакцината со која ќе се оконча пандемијата на коронавирус „може да потрае некое време“, и покрај ветувачките истражувања.
Експертот за заразни болести истакна дека вакцината против КОВИД-19 „ќе биде од суштинско значење“ за завршување на пандемијата, но лидерите не очекуваат непосреден пробив.
Наместо тоа, Фаучи апелира до јавноста да се вакцинира против грип за да „помогне во зачувувањето на медицинските ресурси“ подоцна оваа година.
„Иако останува нејасно колку долго ќе трае пандемијата, активноста на КОВИД-19 веројатно ќе продолжи некое време“, предупреди тој.
Фаучи е долгогодишен директор на Националниот институт за алергија и заразни болести. Во извештајот подготвен за Одборот за енергетика и трговија, тој го опиша и напредокот во американските напори за пронаоѓање на вакцина.
Говорејќи пред членовите на панелот во вторникот, Фаучи изјави дека е „внимателно оптимистичен“ дека дистрибуцијата на вакцините може да започне до „крајот на оваа календарска година и почетокот на 2021 година“.
И покрај напредокот, Фаучи „истури ладна вода“ врз надежите дека вакцината ќе дојде брзо.
„Ригорозното клиничко тестирање потребно за утврдување на безбедноста и ефикасноста на вакцината може да потрае некое време пред лиценцираната вакцина против SARS-CoV-2 да биде достапна за пошироката јавност“, истакна Фаучи во своите писмени забелешки. „Одговорот на COVID-19 во моментов е фокусиран на докажаните јавни здравствени практики“.
Почнувајќи од март, од вирусот се разболеа повеќе од 2,3 милиони Американци, а починаа околу 120.000. (Њујорк тајмс)
