Вагиналните промени за време на породувањето се сосема нормални. Можеби вагината некое време ќе ви изгледа поширока, сува или воспалена. За време на породувањето бебето патува низ цервиксот и вагината. Влезот во вагината мора да се рашири за да се овозможи бебето да помине. Понекогаш кожата меѓу вагината и анусот (перинеум) може да напукне или лекарите да ја исечат за бебето да може да излезе.
По породувањето не е необично да ви се присторува дека вагината ви е поопуштена или сува, и да чувствувате болки за време на сексуалниот однос.
Поширока вагина
Вагината може да изгледа поширока, помека и поотворена. Исто така можеби ќе чувствувате и дека е отечена. Ова е нормално. Отокот и отвореноста на вагината би требало да се намалат за неколку дена по породувањето. Вагината веројатно нема во целост да се врати во состојба во која била пред породувањето, но ова не би смеело да претставува проблем. Ако сте загрижени, разговарајте со вашиот гинеколог.
Стручњаците на сите жени им препорачуваат Кегелови вежби. На тој начин ќе спречите појава на инконтиненција, а вагината ќе биде цврста. Инконтиненција по породување се јавува кај голем број жени, а Кегеловите вежби значително ќе го забрзаат опоравувањето. Вежбите може да ги правите било кога и било каде, и седејќи и стоејќи. Чувството би требало да ве потсетува на задржување урина или столица, задржување на тампон или паузирање при уринирање. Важно е Кегеловите вежби да ги правите често, а стручњаците препорачуваат 10 вежби четири до шест пати дневно.
Сувост на вагината
За вагината е нормално да е сува по породувањето. Ова е последица од намаленото ниво на естроген на кое телото се навикнало за време на бременоста. Со доењето сувоста на вагината може дополнително да се влоши. Кога ќе престанете со доење и менструалниот циклус ќе се нормализира, нивото на естроген ќе се врати во нормала. Ако сте забележале сувост, не очајувајте, бидејќи тоа нема така да биде засекогаш.
Важно е за овој проблем да разговарате со партнерот. На тој начин заедно ќе може да го решите овој проблем.
Болки и шавови на перинеумот
Веројатно ќе чувствувате болки на подрачјето на перинеумот, особено ако сте шиени. Важно е подрачјето на перинеумот да го одржувате чисто, па затоа секогаш мијте ги рацете пред и по менување на влошките и менувајте ги редовно. Туширајте се секој ден.
Ако сте загрижени заради зараснувањето на шавовите, посоветувајте се со геникологот, особено ако чувствувате болка и непријатност, или непријатен мирис. Во зависност од големината на раната кога потполно ќе зарасне, можно е да ви остане белег.
Болки за време на сексуалниот однос
Не постои вистинско или погрешно време за уживање во сексот. Не се брзајте. Ако ве боли, нема да ви биде уживање. Ако ве боли перинеумот, секако појдете на преглед кај гинекологот за да провери дали зараснува и дали е се во ред.
Не е необично ако имате намалена желба за секс. Само што сте родиле, чувствувате замор и се грижите за бебето. Важно е за се да разговарате со партнерот, наместо да молчите и избегнувате секс. Ако и двајцата сте запознаени со проблемот, полесно ќе го пребродите.
По породувањето, не заборавајте на контрацепцијата. Може повторно да забремените по само три недели од породувањето.
