Прв совет за заштита од актуелниот коронавирус е – МИЈТЕ РАЦЕ! Здравиот разум би рекол, ништо ново. Така и е, тоа ни го повторувале од кога знаеме за себе, и секако, тоа правило важи и до ден денес. Но, рацете треба редовно и правилно да се мијат!
Тоа ја прави клучната разлика. Освен тоа, не е секогаш лесно да се всади оваа навика кај децата. Еве неколку совети кои ќе ви помогнат да и вашите деца ги мијат рацете секогаш и како што треба:
Зборувајте за тоа како миењето раце помага
“Мамо, зошто морам да мијам раце?“ Објаснете му на детето дека миењето раце помага да не се разболиме и да другите луѓе не се разболат. Никој не сака да биде болен или да биде виновен оти другиот се разболел. Миењето раце може тоа да го спречи.
На помалите деца ќе морате тоа постојано да им го повторувате, но колку сте поупорни, толку побрзо ќе научат.
Кога мора да се мијат раце?
Научете го детето дека миењето раце е задолжително пред:
- Јадење
- Допирање на устата, очите или носот
- Допирање на рани или гребаница
Како и по:
- Одење во тоалет
- Играње со домашно милениче или животни
- Допирање на храна на животните
- Играње во парк и допирање на реквизитите
- Престој во близина на болно лице
- Допирање ѓубре
- Фаќање валкана пелена
4 чекори за правилно миење на рацете
Научете го детето да ги мие рацете со овие 4 едноставни чекори:
- Натопи ги рацете и земи сапун. Прво детето да ги навлажни рацете со чиста вода. Потоа да стави сапун на рацете и да мие додека не направи доволно сапуница
- Триј, триј, триј, триј ги рацете додека не ја отпееш својата омилена песна два пати. Триј ги дланките, позадината на рацете, меѓу прстите. Не заборавај под ноктите. Таму се собира најмногу прашина и микроби
- Исплакни. Стави ги рацете под чиста проточна вода. Истриј ги убаво дека сосема не се исплакнати.
- Истреси и исуши. Истреси ги рацете од вода неколку пати, а потоа со чист пешкир или хартија исуши ги.
Кога треба да се користи средство за дезинфекција на рацете
Средството за дезинфекција на раце не делува добро кога рацете се видливо валкани и масни. Сапунот и водата се најдобри, оти ја отстрануваат нечистотијата, маснотијата и микроорганизмите во целост. Но, средството за дезинфекција е одлична замена кога немате сапун и вода. Користете средство за најмалку 60% алкохол.
