Еднојајчаните близнаци често се нарекуваат и идентични близнаци, поради што сите, па дури и родителите, генерално мислат дека тие навистина и се идентични.
Стручниот термин за ваквите близнаци е монозиготни, бидејќи се создаваат од една оплодена јајце клетка од која се формира зигот, а тој потоа се дели на два дела.
Заради тоа што физички изгледаат речиси исто, сите мислат дека еднојајчаните близнаци се целосно идентични, меѓутоа, тие се генетски многу различни.
ГЕНЕТСКИ РАЗЛИКИ
Би било логично да се очекува еднојајчаните близнаци да имаат идентична ДНК, бидејќи се создадени од една јајце клетка и еден сперматозоид. Меѓутоа, по спроведена студија, научниците истакнуваат дека човечкиот геном има три милијарди букви. Тие споредувале одредени области на ДНК помеѓу еднојајчаните близнаци и утврдиле дека постојат големи разлики.
Научниците споредувале ДНК на 381 пара близнаци и откриле дека идентичните близнаци се разликуваат во 5,2 генски мутации. Дури 39 пара близнаци се разликуваат во повеќе од 100 мутации, додека кај 38 пара не биле пронајдени разлики на ниво на ДНК.
Експертите објаснуваат дека генетските разлики настануваат поради грешки во копирањето на ДНК бидејќи колку повеќе се копира, толку се поголеми шансите за појава на грешки. Кога се случуваат мутации откако оплодената јајце клетка ќе се подели на два дела, мутациите се појавуваат кај едниот близнак, а кај другиот не. Дури и ако мутацијата се случи пред оплодената јајце клетка да се подели на два дела, може да се случи мутацијата да влијае само на клетките што ќе ги добие еден од близнаците.
ЕПИГЕНЕТИКА
Настрана мутациите, постои уште една важна разлика помеѓу идентичните близнаци, а тоа е епигенетиката.
Имено, гените создаваат одредени протеини, а епигенетиката ги опишува правилата и прописите кога и колку од овие протеини се создаваат. Епигенетските маркери се наследени од нашите родители, но можат да се променат со текот на времето, така што еднојајчаните близнаци со текот на времето стануваат „поразлични“, бидејќи нивната епигенетика се менува одделно.
Експертите истакнуваат дека разликите се многу поголеми отколку што изгледа и дека во речиси три четвртини од еднојајчаните близнаци каде се евидентирани автоимуни болести, се појавуваат само кај еден близнак.
Значи, ДНК-та на идентичните близнаци воопшто не е идентична, а на тоа со текот на времето, дополнително влијае и епигенетиката и некои надворешни фактори.
