Ако вашето дете зачестени има испади на бес пред спиење, секако дека е тешко да го заспиете. Помирете се со тоа дека тантрумите од овој тип се дел од нормалниот развој на детето. Често се појавуваат поради некакво чувство на нелагодност, глад, фрустрација или претеран замор.
Иако повеќето деца можат вербално да го кажат своето незадоволство околу двегодишна возраст, сепак и понатаму им е тешко да изразат се што им пречи, поради што се појавуваат изливите на бес. Ваквите тантруми, кои се појавуваат пред спиење, може да се класифицираат како испади на бес што ги предизвикуваат исцрпеноста, а се одраз на темпераментот и нивото на фрустрација на детето.
ЗОШТО ДЕЦАТА ОДЕДНАШ ПОЧНУВААТ ДА ПЛАЧАТ ПРЕД СПИЕЊЕ?
Кога децата имаат тантрум само за да го избегнат или одложат спиењето, тоа влијае на нивните навики и рутина на спиење, но и на вашата. Ако ја утврдите причината за тантрумот, веројатно ќе си го олесните или дури и ќе го решите проблемот. Еве неколку можни причини зошто вашето дете влегува во тантрум токму пред да легне да спие.
Можеби е болно: Ова е една од најчестите причини зошто детето почнува да цимоли, па потоа почнува неутешно да плаче пред да заспие. Малите деца обично не знаат како да се однесуваат кога чувствуваат физичка непријатност на која не се навикнати.
Чувствува страв: Стравот од непознатото или темнината, епизодите на кошмари или само стравот од тоа да не сте во негова близина, исто така, може да предизвикаат тантрум.
Страв од раздвојување: Ако не поминувате доволно време со вашето дете, или ако тоа се чувствува така, може да плаче од страв дека повторно ќе биде одвоено од вас додека спие.
Замор: Преуморно дете може да стане многу раздразливо и да одбива да заспие.
Недоволна физичка активност: Доколку не е доволно уморно или немало доволно физичка активност во текот на денот, може да одбие да легне на време или да има тантрум.
Гладно е или е жедно: Ако детето е гладно или жедно и не може тоа да ви го објасни, може да плаче додека се обидува да заспие.
КАКО ДА СЕ СПРАВИТЕ СО ДЕТСКИТЕ ТАНТРУМИ ПРЕД СПИЕЊЕ?
- Воспоставете рутина пред спиење
Ставете го вашето дете во кревет секоја вечер во исто време. Бидејќи децата од различна возраст спијат различни часови, приспособете ја рутината пред спиење на возраста на детето.
- Бидете доследни
Бидете доследни во рутината, погрижете се тие точно да ги знаат границите на нивното однесување бидејќи ова е единствениот начин да се воспостават “добри“ обрасци.
- Воведете смирувачки активности еден час пред спиење
Активностите што ги имате еден час пред вашето малечко да си легне се клучни за неговиот ноќен сон. Тргнете ги екраните од употреба и подобро читајте му приказна на детето или само разговарајте и гушкајте се.
