Мајките кои дојат, особено ако се „почетнички“, мака мачат со едно прашање, а тоа е – како да знаете кога бебето е сито. Градите не се калибрирани и на нив не се напишани милилитри, за да можете со сигурност да кажете „Ете, бебето изеде 60 мл, тоа е доволно“.
Иако можеби сте го слушнале советот дека бебето треба да биде на града околу 20 минути за да се засити, тоа и не е баш така. Времето поминато на дојка зависи од тоа дали детето цица правилно и со колкава сила „влече“, односно дали е активен цицач.
Голтање и правилно цицање
Дете кое добива задоволителна количина мајчино млеко дои на карактеристичен начин. Бебето почнува да цица со брзи и нерамномерни движења на вилицата. Потоа, до една минута подоцна, се активира рефлексот за ослободување на млекото и бебето почнува да голта млеко. Заедно со ритмичките движења на усните и образите, благо се движат и ушите и кожата околу слепоочниците. Ако слушате, можете да чуете кога бебето ќе проголта голтка млеко, па пауза, па потоа повторно голтка.
Број на мокри пелени и боја на столицата
Првата столица на бебето се вика мекониум, има темна боја и е леплива. Потоа по два дена добива златно жолта боја и има кашеста конзистенција. Новороденчето може да има столица после секој подој,а се смета дека е нормално да има барем 3-4 искакани пелени до 6. недела. Бебињата постари од 5 дена треба да имаат најмалку 6 мокри пелени за 24 часа, а тие имаат тежина како во сува пелена да сте истуриле 2 лажици вода.
