Стапките на вакцинација кај децата во Европа и во Средна Азија минатата година останаа под нивото пред пандемијата, според проценките за покриеност, објавени вчера.
Светската здравствена организација (СЗО) и УНИЦЕФ соопштија дека 89 проценти од новороденчињата ширум светот примиле најмалку една доза од вакцината ДиТеПер против дифтерија, тетанус и пертусис, а 85 проценти ги примиле сите три дози.
Тоа значи дека 171.000 повеќе деца примиле барем една вакцина, а еден милион повеќе се целосно вакцинирани во 2024 година во споредба со 2023. Извештајот ова зголемување го опишува како „скромен напредок во услови на растечки глобални предизвици“.
Денешната генерација не сведочела на разорните последици од болестите што можат да се спречат со вакцинација – што доведува до опуштеност и го олеснува ширењето на дезинформации
Меѓутоа, во Европа и во Средна Азија просечните стапки на вакцинација кај децата останале на исто ниво или опаднале за еден процент.
Покриеноста минатата година значително варирала меѓу земјите во регионот, со пад на стапките за првата доза од ММР вакцината против мали сипаници, заушки и рубеола, како и за третата доза на ДиТеПер.
Некои земји пријавиле стапки на вакцинација од само 23 проценти за ММР1 и 51 процент за ДиТеПер3. За да се постигне колективен имунитет и да се спречат епидемии на многу болести кои можат да се спречат со вакцинација, потребна е покриеност од 95 проценти секоја година.
Во Европскиот регион, речиси 300.000 луѓе заболеле од магарешка кашлица во 2024 година, што е повеќе од тројно зголемување во споредба со претходната година, изјави регионалниот директор на СЗО, Ханс Клуге.
„Во меѓувреме, повеќе од 125.000 луѓе заболеле од мали сипаници во 2024 година, двојно повеќе од 2023. Ова не се само бројки – тоа се стотици илјади загрижени семејства затоа што нивните деца се болни, а сето тоа можеше да се спречи“, рече Клуге. „Вакцините спасуваат животи, а кога покриеноста опаѓа, болестите се шират“, додаде тој.
Некои земји пријавиле стапки на вакцинација од само 23 проценти за ММР1 и 51 процент за ДиТеПер3. За да се постигне колективен имунитет и да се спречат епидемии на многу болести кои можат да се спречат со вакцинација, потребна е покриеност од 95 проценти секоја година
Клуге ги повика земјите да инвестираат во силни локални здравствени системи, да обезбедат достапност и пристап до вакцини во секое соседство и да се борат против дезинформации.
„На здравствените работници им е потребна поддршка за да стигнат до секое семејство – особено во тешко достапните области. Заедниците мора да бидат оспособени со доверливи информации, за родителите со сигурност да ги вакцинираат своите деца“, изјави Клуге.
Регионалната директорка на УНИЦЕФ за Европа и Средна Азија, Регина де Доминичис, изјави дека вакцинацијата е „жртва на сопствениот успех“.
„Денешната генерација не сведочела на разорните последици од болестите што можат да се спречат со вакцинација – што доведува до опуштеност и го олеснува ширењето на дезинформации“, рече де Доминичис.
Податоците укажуваат и на континуирано подобрување во примената на поновите вакцини, вклучувајќи ја вакцината против хуман папилома вирус (ХПВ).
Меѓу 2019 и 2024 година, стапките на покриеност пораснале од 37 на 40 проценти за девојчињата и од осум на 26 проценти за момчињата за првата доза на ХПВ вакцината.
Стапките на покриеност се зголемени и од 24 на 42 проценти за последната доза на вакцината против ротавирус и од 81 на 93 проценти за третата доза на вакцината против Haemophilus influenzae тип Б.
„Потребна ни е итна, заедничка акција за да ги намалиме празнините во покриеноста со вакцинација и да спречиме враќање на болести што можат да се спречат. Секоја земја има своја улога, дури и оние со висока покриеност со вакцинација“, – изјави Клуге, пренесува „Хина“.
