◊◊◊◊◊◊◊
Навиката да им се дава корка леб на бебињата потекнува одамна уште кога таа била единствено средство на располагање за „острење“ на забите.
Што, всушност, може да се случи ако бебето премногу рано добие корка леб? Најопасно од се е аспирацијата – „вдишување“ на парче корка (или леб) во дишните патишта на бебето. Ова предизвикува гушење на бебето – буквално може да дојде до потполн застој на дишењето и смрт на бебето! Ако не се реагира брзо и детето не стигне на лекар, компликациите може да бидат фатални.
Кога е време за покрупна храна?
Без дилеми, бебето најпрво треба да научи да џвака! За да може тоа да го прави треба да има со што да џвака, а тоа секако се забите! Кога устата ќе им се наполни со запчиња, а тоа ретко се случува пред бебето да загази длабоко во втората година, тогаш е време за „покрупна“ храна. Дотогаш, храната на бебето прво се блендира (барем до крајот на првата година), а потоа се пасира пред да му се даде. Значи, корка лебче во рачето може да му се даде кога ќе има доволно заби да џвака, а тоа е ретко пред втората половина на втората година.
Што да направите ако детето почне да се дави?
Кога првпат му давате корка леб мора внимателно да го надгледувате детето. Не смее да се остави ниту една секунда без надзор, а ако се случи да почне да се дави, треба да го направите следново:
Веднаш земете ја корката леб од раката на детето и земете го бебето во раце;
Свртете го бебето така што ќе гледа надоле и наведнете го;
„Чукнете“ го бебето неколку пати по грбот за да го исфрли „заглавеното“ парче од грлото;
Држете го така неколку минути за да може да поврати;
Бебето не треба да се храни најмалку 45 минути потоа;
Немојте да го заспивате најмалку 30 минути после овој настан. Следете го однесувањето на бебето.
Веднаш на лекар:
- Доколку вашето бебе има потешкотии во дишењето, посини, постојано кашла или се лигави – одете што е можно побрзо до најблиската здравствена установа.
- Ако и после исфрлањето на парчето бебето постојано кашла, вознемирено е и одбива да јаде и пие.
На крајот, се што важи за корка леб, се однесува и на сите намирници кои содржат парчиња што можат лесно да се аспирираат. Се разбира, се подразбира и отстранување на сите играчки и предмети кои детето може да ги проголта или вдиши во дишните патишта.
