Многу често ние сме полни со сочувство за другите, но одбиваме да го понудиме тоа исто сочувство и за себе. Ова можеби најдобро се гледа во примерот на новопечените родители, особено мајките, кои би оправдале некоја друга жена за тоа штп куѓата не им е средена, но себеси ќе се прекорат.
Според објаснувањата на клиничкиот социјален работник Ерин Лејба, секогаш кога ќе се чувствувате фрустрирано, луто, тажно или отуѓено, постои и можност себеси да се почестите со љубезност и сочувство наместо со осудување.
Во продолжение прочитајте и осум ситуации во кои родителите често се строги кон себе и во кои се обвинуваат себеси, а не треба.
- Се чувствуваат осамено
Многу родители се чувствуваат фрустрирани поради драстичната промена што се случува во нивниот однос со партнерот по раѓањето на детето. Врската драстично се менува поради стресот што ја носи грижата за бебето, а околу 67 отсто од паровите се чувствуваат помалку задоволни од врската во првата година од животот на бебето, додека кај некои влошувањето продолжува и неколку години подоцна.
И пријателствата поминуваат низ предизвици, па дури 25 отсто од мајките изјавиле дека се чувствуваат осамено, изолирано, отсечено од пријателите. Лејба советува секоја тешкотија во некој однос да не ја сфаќате лично, туку да се потсетите дека предизвиците се составен дел од оваа сложена фаза од животот.
- Се споредуваат со други
Луѓето едноставно се такви што сакаат да се споредуваат со другите, а тоа може да биде поизразено кај новите родители отколку кај другите. Ќерката на сосетката чита од три години, пријателката секогаш има уредна куќа, а „Марко и Елена“ повторно уживаат на некоја луксузна дестинација. Потсетете се дека никогаш не ја гледате всушност целата ситуација и дека она во што верувате за другите често е илузија.
- Чувствуваат осуда
Според едно истражување од 2016 година, огромното мнозинство родители – 90 проценти од мајките и 85 проценти од татковците – изјавиле дека чувствуваат осудување од другите, било да е тоа од партнери, пријатели, познаници, лекари, наставници, странци на улица, па дури и и од нивните родители.
Точно е, луѓето секогаш коментираат што му даваат родителите на детето да јаде, како се однесува малото, дали почнало во градинка или не, дали е соодветно облечено надвор… Нормално е дека понекогаш ќе се нервирате затоа што луѓето коментираат, проценуваат и осудуваат сè што правите, но обидете се да бидете што е можно понежни кон себе во овие ситуации.
- Децата не се однесуваат убаво
Истражувањата покажале дека само 44 до 46 отсто од родителите мислат дека „добро си ја работат работата“ кога се во прашање децата. Во таа насока, во ситуации кога малечките не се однесуваат убаво, мајките и татковците најмногу се обвинуваат себеси.
Сепак, кога вашето дете не се однесува онака како што сакате, потсетете се дека тоа не значи дека сте лош родител – задача на детето е да тестира колку далеку може да оди, а работа на родителите е да постават здрави граници.
- Се соочуваат со големи промени
Многу родители се чувствуваат некако изолирано, вознемирено откако ќе имаат дете. Родителството со себе носи големи промени во идентитетот, животните навики, губење на некои хоби, патувања и слободно време. Дајте си време да се помирите со новите околности, а во меѓувреме прошетајте, разговарајте со пријателите, водете дневник, сè што ќе ви помогне да се чувствувате подобро.
- Исцрпени се
Родителите често се исцрпени поради недостаток на време за спиење и одмор, а од друга страна им треба повеќе енергија и смиреност за добро да се грижат за своето дете. Едно истражување покажало дека мајките имаат просечно 17 минути сами дневно, а способноста да управувате со вашите емоции е многу под влијание на недостатокот на сон.
Не се обвинувајте себеси што сте уморни и не можете да направите повеќе. Направете што можете и обидете се да си ги поедноставите деновите, барем во првите месеци од родителството.
- Прават грешки
Откако нешто ќе замешате – а сите понекогаш замешуваат и прават грешки – имате два избора, или да си простите или да се задушите со вина. Сепак, многу е подобро да бидете нежни кон себе, можеби да се смеете на некои ваши грешки и да си го покажете истото сочувство што би го покажале на некој друг, пишува psychologytoday.com.
- Се борат со чувствата
Дали некогаш сте се чувствувале лошо поради тоа што се чувствувате лошо? Родителите често се јадат себеси со чувство на вина кога се чувствуваат лошо и ја обвинуваат себеси дека конечно треба да се „вратат на онака како што биле“. Кога сте нерасположени, исплашени, тажни, лути, обидете се љубопитно да ја истражите причината за овие чувства, наместо да се обвинувате себеси.
Поради интензивните чувства кои родителите ги чувствуваат речиси постојано, токму оваа улога на родител е одлична можност да вежбате да покажете сочувство кон себе. На крајот на краиштата, имајте на ум дека децата се угледуваат на вас, па и тие ќе научат да бидат нежни со себе, од вашиот пример.
