Лекарите и негувателите треба да внимаваат на знаци на конфузија или необично однесување кај постарите луѓе, бидејќи тоа може да биде знак за рано предупредување за COVID-19, сугерира новото истражување од Лондон.
Дури и ако немаат кашлица или треска, делириумот и екстремната конфузија се почести кај луѓе постари од 65 години со покревко здравје отколку кај нивните врсници со подобра физичка подготвеност, пренесува „Би-Би-Си“. Иако причините за ова сè уште не се јасни, студијата повикува на поголема свесност во болниците и домовите за стари лица.
Во студијата на лондонскиот „King’s College“ се анализирани податоци од повеќе од 800 лица постари од 65 години
Трите главни симптоми на инфекција со коронавирус се нова и континуирана кашлица, температура над 37,8 ° C и промена на мирисот или вкусот.
Околу 85 проценти од луѓето ќе имаат барем еден од овие симптоми. Сепак, истражувањето сугерира дека одредени возрасни групи може да имаат и други симптоми, како што се дијареја и повраќање кај децата.
Во оваа студија на лондонскиот „King’s College“ се анализирани податоци од повеќе од 800 лица постари од 65 години. Биле вклучени 322 пациенти во болница со COVID-19 и 535 лица кои ја користеле апликацијата Covid Symptom Study за да ги забележат своите симптоми или да пријават здравствени извештаи во име на пријателите и семејството.
Сите добиле позитивен резултат на тестот. Истражувачите откриле дека хоспитализираните постари возрасни лица кои биле класифицирани како слаби имаат поголема веројатност да имаат делириум како еден од симптомите, во споредба со луѓето на иста возраст кои не биле во таа категорија.
