ПИШУВА:
Катерина Шекеровска-Димовска
katerina@pedijatar.mk
Родилиште според највисоки стандарди во Македонија, распослано на над 800 метри квадратни и опремено со најсовремена апаратура – од вчера и официјално започна со работа Центарот за мајка и бебе во клиниката „Жан Митрев“.
„Отворањето на Центарот за мајка и бебе е заокружување на нашата цел, создавање на комплетен здравствен центар и интегрирана клиника со сите услуги на едно место. Создадовме породилен центар со единствен концепт, што е и инвестиција во македонското здравство, така што со услугите ќе придонесе за подобрување и унапредување на породилната пракса во нашиот здравствен систем. Со ова ја комплетираме инвестицијата од пет милиони евра, што ја започнавме со нова опрема, унапредување и проширување на постоечките оддели, отворање неколку комплетно нови оддели и ангажирање на врвни доктори специјалисти“, изјави првиот човек на клиниката, д-р Жан Митрев.
„Посебно ми е задоволство што успеавме да направиме едно зближување, симбиоза помеѓу младите доктори и искусните доктори и на тој начин направивме една солидна екипа со која можеме, како и во сите други области во кои сме застапени, да исчекориме во тој дел напред и да ги поставиме новите темели во однос на породилното и гинекологијата воопшто“, додаде д-р Митрев пред присутните новинари и соработници на прес конференцијата по повод отворањето на Центарот за мајка и бебе.
Црвената лента е пресечена, а зеленото светло е вклучено – Центарот за мајка и бебе во клиниката „Жан Митрев“ е подготвен да ги пречека и прими првите пациентки и да ги згрижи мајката и бебето во сите фази од бременоста и по неа
Новиот оддел на Клиниката располага со две родилни сали, соби за будење, операциона сала, шест инкубатори и четири соби апартмани, неонатолошка, гинеколошка ординација и ординација за прегледи. Центарот за мајка и бебе овозможува мултидисциплинарен пристап со сите потребни капацитети, апаратура и персонал да одговори пред, за време и во постпородилна фаза, како и за сите потреби поврзани со мајката и бебето.
Координатор и раководител на тимот доктори во Центарот за мајка и бебе е прим. д-р Љупчо Петровски – гинеколог акушер, супспецијалист перинатолог, а дел од екипата се и спец. д-р Ирена Андонова – гинеколог акушер, спец. д-р Ненад Лазаров – гинеколог акушер, спец. д-р Владимир Кижески – гинеколог акушер, спец. д-р Виолета Николов – гинеколог акушер, прим. д-р Весна Деловска-Стојкова – специјалист педијатар неонатолог, спец. д-р Лилјана Николиќ – педијатар неонатолог и други.
Центарот за мајка и бебе располага со најсовремената опрема од врвни светски производители и искусен медицински тим кои ќе бидат на располагање во центарот во секое време и грижа за мајката и бебето во сите фази од бременоста и по неа.
„Во Центарот ќе пружаме комплетен третман на бремените жени, од почеток до крај на бременоста и на новородените. Располагаме со најсовремена технологија и апаратура за третман на бремените жени и новородените… Се надевам и на соработка со колегите од другите здравствени установи, отворени сме за соработка“, потенцира прим. д-р Љупчо Петровски, гинеколог акушер, супспецијалист перинатолог.
Областите во кои ќе делува центарот ги опфаќаат сите три тримесечја од бременоста, спроведување на дијагностичките испитувања, ХСГ лабораторија, генетски испитувања како амниоцинтеза, хорионбиопсија, ултразвучни и неинвазивни пренатални тестови.
„Се работи за ексклузивен простор кој е најсовремено опремен, буквално се пратени сите светски протоколи, домашните сме ги надминале поодамна… Горди сме што добивме доверба како екипа да оствариме една голема визија на д-р Жан Митрев, а тоа е ова ново родилиште, кое нема да биде само родилиште, туку ќе биде конкретен гинеколошко-акушерски оддел“, истакна д-р Ненад Лазаров, специјалист гинеколог акушер, кој ги откри адутите на центарот. „Ова е една огромна инвестиција – тоа верувам дека на сите ни е јасно, успеавме да направиме еден многу фин, мултидисциплинарен тим кој функционира компактно. Втората работа со која може да се пофалиме е прекрасниот анестезиолошки тим со кој располага оваа болница, а за една трудница во 21 век и тоа како е битен делот за безболноста на породувањето. Самиот принцип на работа се состои во холистички пристап кон пациентката, буквално се што можеме за една трудница ќе направиме во нејзината соба, со тенденција за максимален комфор и безбедност. Ќе бидеме можеби и единствена институција во државава којашто ќе нуди и исклучиво женска екипа за породување“, додаде д-р Лазаров.
„Лекарот во кого е стекната доверба пред породувањето, односно оној кој ја водел бременоста, ќе биде сигурно достапен, односно присутен на самиот чин на раѓање“, потенцира д-р Лазаров, додавајќи дека во овој Центар грижата за мајката и бебето е комплетна и на располагање 24 часа.
Опремата составена од гинеколошки столови и столови за раѓање, ЕХО апарати, ЦТГ апарати, инкубатори со температурна контрола, ресусцитатори, двофункционални блендери со ЦПАП и навлажнет воздух со висок проток, е набавена од истакнати и врвни светски производители со што се докомплетира овој инвестициски циклус во вредност од над пет милиони евра.
Центарот започнува со следење на трудниците уште во првиот триместар, менаџирање на патолошки состојби во бременоста, безбедно и безболно породување, и адекватно следење во постпарталниот период. Неонатолошкиот оддел е опремен со најсовремена опрема и искусен медицински персонал кој работи со интердисциплинарен пристап обезбедувајќи комплетна педијатриска грижа за новороденото.
„Со нескриена возбуда од преголем восхит дојдов во оваа болница во која наидов на прекрасен амбиент, апаратура со висока технологија, добро сочинет тим од гинеколози-акушери, педијатри, анестезиолози под водство на д-р Жан Митрев. Се надевам дека грижата за мајките и бебињата ќе биде навистина одлична како и досега, но уште повеќе со овие технологии и вака збратимен тим. Честитки уште еднаш и да тече убаво работата!“, посака пред присутните на прес конференцијата прим. д-р Весна Деловска-Стојкова, педијатар неонатолог со четиридецениско искуство во областа на неонатологијата, а сега дел од тимот на Центарот за мајка и бебе.
Црвената лента е пресечена, а зеленото светло е вклучено – Центарот за мајка и бебе во клиниката „Жан Митрев“ е подготвен да ги пречека и прими првите пациентки и да ги згрижи мајката и бебето во сите фази од бременоста и по неа.
По повод отпочнувањето со работа на центарот креирани се и специјални пакети без дополнителни или скриени трошоци. Пакетите за породување ги опфаќаат услугите во сите фази од бременоста и по неа.
Радоста се раѓа тука – „Жан Митрев“ – Центар за мајка и бебе. За повеќе детали и консултации, јавете се во контакт центарот на клиниката на 02/3091 484.
