Гестацискиот дијабетес или уште познат како шеќерна болест во бременоста се јавува кога нивото на шеќер (гликоза) во крвта на трудницата станува превисоко. Како што пренесува клиниката Мајо, овој тип на дијабетес првпат се дијагностицира токму во текот на бременоста, а трудницата никогаш претходно немала проблем со нивото на шеќерот во крвта.
Со оглед на тоа дека последиците не се воопшто безопасни, тоа може негативно да се одрази на текот на бременоста, како и на здравјето на детето. Но, кој е најлесниот начин да се препознае дека бремената жена воопшто има гестациски дијабетес?
Како што објаснуваат гинеколозите, дијабетесот во бременоста често не предизвикува никакви видливи знаци или симптоми, што може дополнително да ја отежне дијагнозата. Сепак, нагласуваат дека сепак кај повеќето трудници се јавуваат некои симптоми, или два од нив. Тоа се зголемена жед и зачестено мокрење.
Исто така, постојат и некои предупредувачки знаци кои исто така може да се појават, само малку поретко. Ова вклучува зголемен замор, мачнини, проблеми со видот, поконкретно заматен вид и чести инфекции на вагината, мочниот меур или кожата. Доколку не се препознае навреме, гестацискиот дијабетес може да доведе до зголемен ризик од развој на дијабетес тип 2 кај децата.
Покрај дијабетесот кај бебето, други последици од нерегулираниот гестациски дијабетес може да бидат раѓање на големо бебе (макросомија), развој на вродени малформации, прееклампсија, спонтан абортус, забавено созревање на органите на бебето, особено на белите дробови и неонатална смрт.
