Родителите имаат многу грижи. Дали децата спијат доволно, дали се здрави, колку им е балансирана исхраната… Списокот е долг. За жал, тие често се фокусираат на физичката благосостојба, а ја занемаруваат емоционалната благосостојба. Се работи за подеднакво важни работи. Многу може да се придонесе само со поставување прашања на децата на дневна основа.
Зошто поставувањето прашања им помага на децата?
Родителите понекогаш се грижат да не ги разгалат своите деца и премногу да не се мешаат во нивните животи. Сепак, нема граници во давањето љубов и внимание на децата, ниту треба да има. Тимот од професионалниот здравствен сервис Psych Central тврди дека приврзаноста меѓу родителите и децата треба да се гради и дека не постои ништо што може да ја замени.
Иако постојат многу начини за поврзување со децата, многу експерти се согласуваат дека токму поставувањето отворени прашања ги поттикнува децата да се изразат и да дојдат во контакт со нивните чувства. Кога поставувате прашања, активно слушајте ги нивните одговори, а тие ќе се изразат без потреба за криење или потиснување. Ова го подобрува развојот на емоционалната интелигенција и ја поставува основата за добри и квалитетни комуникациски вештини во нивните други односи во иднина.
Кои прашања да им ги поставите на децата?
Според советите стручњаците за детски развој, постојат пет конкретни прашања што родителите треба да им ги постават на своите деца за да го негуваат нивното ментално здравје. Покрај тоа што децата ќе бидат свесни дека можат да ви се доверат, ќе увидат дека сочувствувате со нив и дека се грижите за нивните чувства и интереси.
Прашањата се следни:
- Како се чувствуваш денес?
- Што сакаш да правиме заедно денес?
- Што те насмеа денес?
- На што си благодарен/на?
- Дали има нешто што би сакал/ла да го споделиш со мене, а ти е тешко да го кажеш?
Време поминато со децата
На крајот, прашањата се важни, но ако не поминувате време со вашите деца, тие нема да бидат ни приближно доволни за да развиете длабока врска со нив. Животниот ритам е забрзан, а обврските на родителите се многубројни, но потребно е барем мал дел од денот да им се посвети на децата и во тие моменти да игнорирате се што може да ви го одвлече вниманието.
За жал, ништо не е гаранција дека вашите деца ќе бидат заштитени од негативноста на остатокот од светот. Овие методи, сепак, помагаат да ги преземете најважните чекори за да изградите однос полн со доверба со вашите деца, помагајќи им да развијат отпорност, емпатија и самосвест, за да можат подобро да се справат со сето она што им го носи иднината.
