Родителите го сакаат најдоброто за своите деца, но забораваат дека и самите некогаш биле на нивно место. Одговорноста за туѓ живот често ги принудува да заборават како е да се биде дете и го повторуваат сето она што го правеле нивните родители, вклучувајќи ги и сите оние работи што ги нервирале и поради кои се оддалечувале од родителите. Но, постојат неколку работи за кои се верува дека ги прават сите родители, а кои всушност ги оддалечуваат од нивните деца.
Постојано ги испрашувате за нивните проблеми
Постојаното испрашување може да ги изнервира децата и да ги натера сами да сакаат да ги решат своите проблеми, а не да ги споделат со родителите. Сите луѓе различно се справуваат со стресот, а децата не се разликуваат. Наместо постојано да ги испрашувате, сменете ја тактиката и не ги присилувајте да ви кажат нешто што не сакаат. Поставувајте им помалку директни и ненаметливи прашања кои ќе ги поттикнат да се отворат.
Дозволувате вашето расположение да влијае на односот со детето
Родителите понекогаш не се ни свесни колку нивното расположение влијае на децата. Тие впиваат речиси сè што гледаат од родителите, па затоа е важно родителите да знаат како да управуваат со своите емоции и да се справат со стресните ситуации. Знаеме дека тоа не е секогаш наједноставната задача, но одвојте време за себе и дајте им на децата емоционална поддршка која им е потребна.
Децата се обидуваат да ви се доверат, а вие правите нешто друго
Животот со децата не е секогаш лесен и понекогаш е речиси невозможно да ги натерате да ви се доверат. Но, кога тоа ќе го направат, а не добиваат целосно внимание од своите родители, тие може да се чувствуваат како да не им се приоритет и во иднина да ги задржат емоциите за себе. Затоа, следниот пат кога вашето дете ќе одлучи да ви се довери, посветете му целосно внимание и целосно вклучете се во разговорот.
Ги прашувате како го поминале денот
Исто како и возрасните, децата можат да се чувствуваат уморни и безволни на крајот од денот и најнормалното прашање како „како го помина денот?“, може многу да нервира. Најдобар начин да откриете како го поминале денот е да им дадете простор и да ги оставите сами да ја започнат приказната. Или прво вие да го раскажете вашиот ден и да почекате тие да ви кажат за нивниот ден.
Не ги сфаќате сериозно нивните проблеми
Веројатно една од најлошите работи што родителите можат да ја направат е да не ги сфаќаат своите деца сериозно. Можеби проблемите на децата не изгледаат толку големи, но наместо да ги задевате, споделете сопствено искуство и помогнете им да го решат проблемот што ги мачи.
На други им го кажувате она што детето ви го признало во доверба
Кога ќе им кажете на пријателите или семејството нешто што вашето дете ви го кажало во доверба, ризикувате вашето дете никогаш повеќе да не ви се довери и да почне да крие тајни од вас. Никој не сака другите да ги кажуваат неговите тајни, особено децата кои допрва учат кому да веруваат. Кога ќе откриете она што ви го кажало вашето дете, можете да ги повредите неговите чувства и да го направите вознемирено.
Лошо реагирате кога детето покажува знаци на независност
Како што растат, децата бараат се повеќе слобода. Знаеме дека не е секогаш лесно и дека на родителите им е тешко да се помират со фактот дека децата растат, но не се обидувајте да ги контролирате или спутавате. Наместо да им поставувате построги правила, дозволете им сами да донесат некои свои правила и гледајте како се справуваат со одговорноста.
