Родителството е исклучително тешка работа и понекогаш родителите прават одредени грешки кои го нарушуваат психичкото здравје на детето. Како што објаснуваат психолозите, повеќето од овие грешки родителите ги прават потполно несвесно, но сепак им штетат на децата, што може да има негативни последици дури и во нивната зрелост.
Имено, денешниот свет и средината во која живееме се исклучително стресни, и тоа не само за возрасните, туку и за децата. Меѓутоа, токму поради ова, одредени грешки што ги прават родителите, а кои влијаат на психичкото здравје на детето, подобро е на време да се препознаат и да се избегнат, советуваат психолозите.
Занемарување на чувствата и емоциите на детето
Малите деца не знаат на најдобар начин да се справат со своите чувства, поради што често реагираат бурно или несоодветно. Во овие случаи, родителите понекогаш знаат да го смират детето со тоа што ќе му кажат да не биде тажно или да се смири. Психолозите тврдат дека тоа е сосема погрешно бидејќи, како што велат, гсо тоа го уверуваме детето дека неговите чувства не се валидни, што може да влијае на неговите вештини за решавање проблеми во иднина.
Решавање на секој нивни проблем
Сосема е разбирливо родителите да се обидуваат да му помогнат на своето дете кога има одреден проблем. Меѓутоа, ако секој пат скокаме и му го решаваме проблемот, психолозите тврдат дека повеќе му нанесуваме штета отколку корист. Секое дете треба да биде свесно дека неуспесите се дел од животот и можност да научи нешто ново, во спротивно никогаш нема да стане независен и самоуверен возрасен човек.
Прекумерно попуштање на желбите на детето
Да се опсипува детето со љубов е добро, но не и ако вклучува подароци кои не му се ни потребни, објаснуваат психолозите. Многу родители попуштаат на секое барање на своето дете мислејќи дека тоа ќе го направи посреќно. Сепак, тоа не е точно бидејќи исполнувањето на сите негови желби може да има контраефект, со оглед на тоа што детето често ја губи самоконтролата во овој случај.
Кога не ги исполнувате нивните барања, децата стануваат лути, а понекогаш и насилни. Исто така, со ова однесување родителите ги учат дека најважни се материјалните работи, што може да биде многу лошо.
Очекување на совршенство од детето
Никој не е совршен, па ни родителите не треба да очекуваат нивното дете да биде совршено, објаснуваат психолозите. Очекувањето совршенство од децата е една од најчестите грешки што ги прават родителите. Наместо тоа, тие треба да ги научат да поставуваат цели и да дадат се од себе за да ги постигнат истите тие цели.
