Природната навика за цицање го зголемува ендорфинот одговорен за доброто расположение во мозокот на вашето бебе. Цицањето – гради, цуцла, палец – поттикнува смирувачки рефлекс и прави бебето да се чувствува удобно.
Кога децата престануваат да ги цицаат палците?
Повеќето деца сами од себе престануваат да ги цицаат палците на возраст од две до четири години. Не е потребна никаква интервенција! Но, ако вашето дете продолжи редовно да го цица палецот по избивањето на трајните заби, време е да размислите за интервенција.
Долготрајното и продолжено цицање палец може да доведе до прекумерно или отворено загризување, аномалија при која предните заби не се допираат при загризот, односно има празнина меѓу нив, што може да доведе до болно џвакање, како и потешкотии во говорот и изговарањето на одредени зборови.
Повеќето деца ќе се откажат од цицање палец поради притисокот од врсниците пред да започнат да одат во училиште, но на некои ќе им треба помош и охрабрување.
Започнете со мали чекори!
Мислењето на педијатрите е дека е важно да се разговара за вакви теми со децата од нивна перспектива. Но буквално. Кога зборувате со вашето дете за цицањето на палецот, клекнете под нивото на нивните очи. Овој став им помага на децата да почувствуваат дека им се обраќате со почит. Користете само позитивни и пријателски зборови, фокусирајќи се само на проблемот што го решавате.
Децата ги цицаат палците кога се чувствуваат несигурни или имаат потреба од утеха. Ако ова ви звучи познато, помогнете му на вашето дете да најде нова смирувачка навика. Љубовта обично прави чуда овде. Казната во никој случај не е опција!
Ако вашето дете е страствен “цицач“, а има одредено време кога тоа му е омилена навика, за време на читање приказна или непосредно пред спиење, договорете се дека ова е единствениот момент кога може да се забавува на овој начин. Затоа дозволете му да го цица палецот додека читате приказна или непосредно пред спиење.
Ако детето е постаро, објаснете му дека цицањето палец може негативно да влијае на неговите заби, говор и кожа. Всушност, вашето малечко веројатно нема поим дека цицањето палец е лоша навика. Кажете нешто како “цицањето палец може да ти ги искриви забите“, а можете да побарате од стоматологот да објасни што може да се случи ако не престане да цица.
Кога не е во просторијата, а знаете дека може да ве слушне, гласно шепнете на друго лице (или дури и на плишана играчка) колку сте горди што вашето дете се обидува да ја прекине навиката за цицање палец. Децата попрво ќе реагираат на пофалби отколку на критики.
Обидете се да кажете нешто како: „Ное беше одличен и не си го цица палецот денес. Многу сум горда на него!’ или „Знам дека и е тешко на Тара да престане да го цица палецот, но навистина напорно се труди да заспие без тоа“.
