“Проблем со намален апетит кај децата, пријавуваат дури 25 проценти од родителите. Вобичаено родителите се јавуваат кај педијатар бидејќи детето кое дотогаш јадело, почнува помалку да јаде. Често тоа се случува по шестиот месец од животот, кога интересот кај доенчето за храна се намалува, па детето почнува помалку да јаде, во споредба со предходниот период. Но, доколку детето е во добра општа состојба и со уреден раст на телесната маса, тоа не е загрижувачки“, смируваат педијатрите.
Но, доколку дете кое не јадело помеѓу оброци, одбива да јаде и губи на телесна маса, тогаш станува збор за дете со слаб апетит и потребно е да се јавите кај лекар, предупредуваат педијатрите. Тие потенцираат дека причините за таквата состојба може да бидат различни – од анемија поради недостаток на железо, почеток на акутни болести, хронични дигестивни пречки, а многу се чести и оние неинвазивни неврзани со органски болести.
Доколку не станува збор за болест, педијатрите го препорачуваат следниов начин за поттикнување на апетитот кај детето:
- Почитувајте го апетитот на детето или недостатокот на апетит
- Ако детето не е гладно, не го присилувајте на оброк или ужина
- Не го наградувајте за изеден оброк
- Послужете му ја храната на интересен начин
- Вклучите го детето во изборот и подготовката на храната
- Послужете му на детето мали порции
- Овозможете му на детето само да побара уште храна
- Држете се до рутината и послужувајте му оброк во приближно исто време
- Трпеливо и умерено нудете му нови намирници
- Бидете добар пример.
- Овозбедете му на детето редовна физичка активност и престој на отворено.
