Поставувањето јасни и доследни домашни правила е важно за воспитувањето на децата. Овие правила придонесуваат за создавање стимулативна средина, помагајќи им на децата да развијат одговорност и почит. Детскиот терапевт и мајка на три деца, Џесика ВандерВиер, верува дека куќниот ред е еден од начините на кои им помагаме на нашите деца да се чувствуваат безбедно. Таа неодамна на социјалните мрежи ги сподели петте правила кои ги учи своите деца.
1. Ако некој каже застани или не, тоа го почитуваме
Терапевтката советува да поставиме јасни граници со децата за меѓусебното почитување. Кога некој каже „застани“ или „не“, тоа значи дека треба да престанеме.
„Ако некој изрази дека не му е пријатно или сака да престане со нешто како скокоткање, сите креваме раце“, вели таа.
2. Подготвувањето за спиење започнува во 18:45 часот
ВандерВиер истакнува дека времето за подготовка за спиење е јасно одредено, а децата се свесни за тоа. Таа им вели на своите деца: „Време е да се подготвите за спиење. Ако предолго се подготвуваме, нема да имаме време за читање книга и песни“.
3. Се почитува сопственоста на другите
Таа смета дека е важно децата да ги научиме да го ценат и почитуваат имотот на другите луѓе. Сите предмети се важни и заслужуваат почит. Таа дава пример: „Не можам да ти дозволам да го задржиш цртежот на сестра ти. Таа побара од нас да го чуваме на фрижидерот“.
4. Озборувањето не се толерира
Начинот на кој зборуваме за другите додека тие не се присутни треба да биде пример за нашите деца. “Еј, слушам како зборуваш за облеката на Џејми. Сфаќам дека не ти се допадна, но не е во ред да се потсмеваш на тоа. Ајде да ја смениме темата”, дала пример таа.
5. На маса нема мобилни телефони
Терапевтот не дозволува никаква технологија на маса, било да се тоа таблети, мобилни телефони или слично. Таа смета дека ова е време за поврзување.
„Семејните правила треба да се засноваат на вашите вредности. Тие исто така треба да бидат создадени со придонес од целото семејство, вклучувајќи ги и вашите деца“, заклучува ВандерВиер.
