Нежното родителство, кое се темели на емпатија, почит и емоционална поврзаност, стана сè попопуларен стил на родителство во последниве години. Многу родители го гледаат тоа како поздрава алтернатива на строгите и авторитарни методи. Целта на овој стил на родителство е да се негуваат емоционално интелигентни и сигурни деца, но сè повеќе родители, особено мајки, во пракса се чувствуваат исцрпено, обесхрабрено и преплавени од очекувањата.
Во продолжение, издвојуваме пет причини зошто нежното родителство понекогаш не функционира како што е замислено, според достапните истражувања и научни трудови.
Големо емоционално оптоварување
Според истражување објавено во 2023 година во списанието „Frontiers in Psychology“, сè повеќе родители доживуваат таканаречен синдром на прегорување. Станува збор за психолошка состојба која се манифестира преку емоционална исцрпеност, дистанцирање од децата и чувство дека тие не се ефикасни во својата родителска улога.
Токму високите емоционални барања, како оние кај нежното родителство, можат да го зголемат ризикот од хроничен стрес и ментални тешкотии. Родителите честопати се соочуваат со очекувањето дека мора да останат смирени, емпатични и трпеливи во секое време – и кога нивното дете има напад на бес и кога самите се исцрпени. Доколку немаат соодветна поддршка, чувството на преоптовареност само се зголемува.
Притисок да се биде совршен родител
Социјалните мрежи дополнително го зголемија притисокот врз родителите. Истражување од Државниот универзитет во Охајо покажало дека трендовите за „идеално родителство“ на интернет ги наведуваат многумина да ја почувствуваат потребата да се однесуваат беспрекорно. Наместо само да се стремат да бидат добри родители, многумина сакаат да бидат совршени, што може да има негативно влијание врз нивното ментално здравје на долг рок.
Овој пристап, познат и како „перформативно родителство“, остава малку простор за грешки, фрустрации или емоционални испади. Сето ова го отежнува справувањето со секојдневните предизвици и создава дополнителен стрес.
Родителската прегореност влијае и на децата
Родителската прегореност не ги погодува само возрасните. Студија објавена во 2024 година во списанието Children открива директна поврзаност помеѓу родителската емоционална исцрпеност и негативното однесување кај децата. Иако родителите сакаат да останат доследни во својот нежен пристап, емоционалната исцрпеност може да ги наведе да посегнат по строги или несоодветни методи на родителство.
Кога се губи капацитетот за трпение и сочувство, се поткопуваат темелите на нежното родителство, а децата тоа и тоа како го чувствуваат.
Бавните резултати предизвикуваат фрустрација
За разлика од методите што вклучуваат казни или награди, нежното родителство дава резултати само во подолг временски период. Ова може да биде особено фрустрирачко кога родителите се соочуваат со постојани предизвици во однесувањето на своето дете и не забележуваат никаков напредок. Таквата несовпаѓање помеѓу вложениот напор и резултатите може да доведе до обесхрабрување и сомнеж во ефикасноста на самиот пристап.
Емоционалната недоследност ги збунува децата
Кога родителите се исцрпени, тешко им е постојано да покажуваат смиреност и емпатија. Дури и ако имаат добри намери, можат да се појават импулсивни или контрадикторни реакции – тие се смирени во еден момент, а реагираат со лутина во следниот.
Овој вид емоционална нестабилност го збунува детето и може да го наруши неговото чувство на сигурност. На долг рок, детето потешко ги препознава границите и правилата на однесување, што може да доведе до уште поголеми проблеми дома.
