Американската едукаторка за родителство Ејми Мекреди за Today ги споделува најчестите грешки на родителите, што никогаш не ги прави со своите деца. Како што објаснува, разбирливо е дека родителите нема секогаш да постапат исправно кога се во прашање нивните деца и сосема е во ред понекогаш да погрешат.
„Како експерт за позитивно родителство и едукатор, ги составив петте најголеми грешки кои родителите несвесно ги прават, а јас сама никогаш не ги спроведувам. Ова се добронамерни, но не многу корисни стратегии за родителство кои отсекогаш сум се трудела да ги избегнам во мојот дом, а ги советувам и другите родители да го пробаат истото. Се разбира, никој не е совршен, но ако можете да ги минимизирате, тоа ќе биде многу корисно на долг рок“, вели таа.
Никогаш не им плаќам на децата за изршување на домашните обврски
„Често слушам од родителите дека на своето дете му даваат џепарлак ако ја исчисти собата или ги измие садовите. Апсолутно не се согласувам со оваа воспитна тактика и никогаш не ја користам со моите деца. Зошто? Децата треба да се научат дека домашните работи и обврски се составен дел од секој ден, а не нешто што треба посебно да се наградува“, објаснува Меккреди и додава дека на овој начин парите стануваат надворешен мотиватор за децата, што не е добро ако навистина сакаме да развиеме внатрешна мотивација кај децата, која првенствено произлегува од добрата волја, одговорноста и истрајноста.
Никогаш не ги ставам во казна
Ова е една од најчестите родителски тактики за казнување на децата, но едукаторката нагласува дека воопшто не ја поддржува и смета дека тоа нема резултати. „Ова е популарна родителска техника, но тоа не значи дека е ефикасна. Имено, целта на секоја дисциплинска техника треба да биде оспособување за подобро однесување со зачувување на силна емоционална поврзаност меѓу родителот и детето, а казнувањето не го овозможува тоа“, објаснува таа.
Никогаш не ги етикетирам децата
Многу родители, обично несвесно, ги етикетираат своите деца, особено ако имаат неколку. Мекреди смета дека ова е една од најголемите родителски грешки која може да има сериозни последици во подоцнежната возраст на детето. „Едни ги сметаме за паметни, други за добри помагачи, додека трети ни се само предизвикувачи на неволја. Верувале или не, дури и позитивните етикети ги обесхрабруваат вашите деца бидејќи поставуваат споредба и натпревар со врсниците, што никогаш не дава добри резултати“, објаснува едукаторката.
Никогаш не ги терам да изедат се што им е во чинијата ако сакаат десерт
Никогаш не ги присилувајте децата да ја исчистат чинијата пред да изедат десерт, советува едукаторката. „Во слатките треба да се ужива како и во секоја друга храна – доброволно. Тоа е затоа што секој тип на присилно хранење, без разлика дали преку ценкањее, казнување или кој било друг метод, е основа за борба за моќ за време на оброкот, која никому не му користи. Го одзема фокусот од поттикнување здрави навики во исхраната и наместо тоа создава тензија помеѓу родителот и детето. Исто така, го претставува десертот како награда за јадење „помалку пожелна“ храна, како што е зеленчукот – што не е баш начинот на размислување со кој сакаме нашите деца да растат“, објаснува Меккреди.
Никогаш не ги казнувам физички
Многу родители прибегнуваат кон удирање како последно средство или со погрешна цел да одржат важна лекција, но истражувањата покажуваат дека дури и најдобронамерното удирање може да го зголеми нивото на агресија, да го поттикне лажењето за да се избегне казна и да загрози односот помеѓу родителот и детето. Со истото се согласува и Меккреди, која нагласува дека никогаш физички не ги казнува своите деца.
„Сè може да се реши со разговор, децата се многу едноставни и сакаат да учат од нас. Токму преку нашиот пример тие учат како да се однесуваат и какво однесување е дозволено, а што строго забрането. Родителите треба да научат самоконтрола и да се држат до неа, без разлика колку понекогаш може да биде предизвикувачко, заморно и тешко родителството“, додава таа.
