Од шест до 24 месеци доаѓа период кога бебето пробува нови вкусови и почнува да јаде цврста храна. Пребирливоста во овој период е многу ретка, но секако, бидејќи секое дете е различно, може да се случи и тоа.
Се случува детето да одбие храна кога едноставно не е гладно, па затоа е многу важно да има редовни оброци и воспоставен распоред кога и што јаде.
Мајчиното млеко му дава на детето најголем број на хранливи материи, до приближно девет месеци, што значи дека е важно порано да внесува друга храна, а од шест до девет месеци време е за бројни експерименти кога е храната во прашање.
Доколку детето првпат одбие храна, тоа не е причина за грижа, а ваквото однесување може да трае и до првите неколку недели по внесувањето на храната, која не е мајчиното млеко. Меѓутоа, доколку бебето одбие храна дури и на седум месеци, време е да побарате помош од педијатар.
Зошто бебето одбива цврста храна
Некои бебиња не се гладни во тоа време. Бебето има многу мал желудник, па затоа е неопходно да се храни детето на секои два часа, односно на три часа кога ќе наполни 12 месеци. На шест месеци, бебињата се уште цицаат и треба да ги храните пет до шест пати на ден. Прво, воведете цврста храна еднаш или двапати дневно, една до две лажици помеѓу хранењето. Зголемувајте ја дозата секој ден. Не постои правило дека мајчиното млеко во овој период е приоритет пред цврстата храна, но повеќето мајки го прават токму тоа. Поради оваа причина, се случува бебето да биде едноставно сито кога е време за цврст оброк.
Бебето е уморно или нервозно. Ако на вашето дете му давате цврста храна пред спиење, бебето можеби нема да го интересира храната, бидејќи е уморно. Обидете се да го нахраните откако ќе спие или кога е будно и среќно.
Различна структура на храната. На некои бебиња им се допаѓа малку поцврсто, додека други уживаат во изгмечена храна. Затоа експериментирајте додека вие и вашето бебе не разберете што најмногу им одговара.
Околината го одвлекува вниманието. Фокусирајте се на самиот оброк, не дозволувајте детето да јаде пред цртан филм, бидејќи тогаш постои можност да не сака да јаде. Исто така, создадете навика детето да јаде на маса или хранилка.
Премногу притисок. Ако постојано се грижите за хранење на бебето и создавате напнатост, бебето може да почувствува притисок и да го изгуби апетитот.
