Сезоната на крлежи е во пролет и лето, а тоа е токму периодот кога многу семејства одат на излети и уживаат во природата. Доколку планирате некој излет во природа со вашето семејство, еве неколку совети кои можат да ви помогнат да се заштитите себе си и членовите на вашето семејство од крлежи, кои можат да бидат и носители на некои болести, како на пример Лајмска болест.
Пробајте некои од следниве совети:
- Носете светла облека на која крлежите полесно се забележуваат.
- Носете затворени чевли или чизми, долги панталони и ракави.
- Ставете ги ногавиците во чорапи за дополнителна заштита од крлежи.
- Ако имате долга коса, врзете ја во опавче или носете капа.
- Ако се шетате во шума, бирајте постоечки патеки, а избегнувајте места каде тревата е висока, има грмушки и слично.
- Откако ќе влезете дома, измијте ја кожата на децата со сапун и вода, а целата облека што сте ја носеле исперете ја на висока температура.
Проверувајте ја кожата на детето секој ден за да се уверите дека некаде нема закачено крлеж – обрнете посебно внимание на пределите зад ушите, во пределот на препоните, зад колената и под пазувите. Ако најдете крлеж, веднаш отстранете го.
