Хуман папилома вирус или скратено ХПВ е најчестиот сексуално пренослив вирус. Станува збор за група на вируси кои ја инфицираат кожата или различни мукозни мембрани. Подеднакво ги погодува и мажите и жените. Најчесто ги афектира младите лица веднаш по стапувањето во сексуални односи. Повеќето од инфекциите не се опасни, но одредени типови на ХПВ може да предизвикаат генитални брадавици и неколку видови на рак, од кои се издвојува ракот на грлото на матката.
Во текот на животот, повеќе од 80 % од луѓето ќе бидат заразени со еден или повеќе видови на овој вирус. Голем дел од нив нема да покажат никакви знаци или симптоми што го отвора патот за негово пренесување на други лица преку полов однос или по неполов пат од мајка на новородено или преку облека.
ХПВ типовите 16 и 18 се најчести причинители на ракот на грлото на матката. Според Светската здравствена организација над 630 милиони луѓе во светот се заразени со ХПВ, а секоја година од рак на грлото на матката умираат над 250.000 жени во светот. Во земјава ракот на грлото на матката е на второ место веднаш после ракот на дојката, кај жени на возраст од 15 до 44 години. Сето ова може да се превенира со вакцината против ХПВ, која го намалува ризикот од настанување на рак на грлото на матката. На тема ХПВ вакцина разговараме со проф. д-р Катарина Ставриќ, специјалист педијатар-имунолог и професор на Медицинскиот факултет во Скопје.
