Шеќерот станува основна намирница во исхраната на просечниот Американец пред првата година, откриле истражувачите.
До моментот кога бебињата ќе станат мали деца на возраст од 19 до 23 месеци, тие во просек дневно внесуваат повеќе од 7 лажички додаден шеќер – што ја надминува и количината на дневниот препорачан максимум за возрасни.
Истражувачите ги разгледале податоците од повеќе од 800 новороденчиња и мали деца на возраст меѓу 6 и 23 месеци од Националното истражување за здравје и исхрана 2011-2014 година, во кое родителите забележале сè што јадело нивното дете во период од 24 часа.
Резултатите покажале:
- 85 проценти од доенчињата и малите деца консумираат додаден шеќер секој ден.
- Околу 60 проценти од бебињата на возраст од 6 до 11 месеци имаат во просек нешто помалку од една кафена лажичка шеќер дневно.
- 98 проценти од бебињата на возраст од 12 до 18 месеци во просек внесуваат 5,5 лажички шеќер дневно.
- 99 проценти од бебињата на возраст од 19 до 23 месеци во просек внесуваат повеќе од 7 лажички шеќер во даден ден.
Американското здружение за срце препорачува не повеќе од 6 лажички (25 грама) за возрасни жени и деца на возраст од 2 до 19 години и 9 лажички (36 грама) за возрасни мажи, иако претходните истражувања сугерираат дека повеќето Американци консумираат повеќе.
“Ова е првпат да ја разгледаме потрошувачката на додаден шеќер кај деца на возраст под две години“, изјави водечкиот автор на студијата Кирстен Херик, нутриционист епидемиолог во Центарот за контрола и превенција на болести (ЦДЦ). Истражувачите ја пребројувале храната што содржи шеќер од трска, сируп од пченка со висок процент на фруктоза, мед или други форми на шеќер, но не и природни шеќери кои се наоѓаат во производите како што се овошјето, зеленчукот и млекото.
Исхраната со висока содржина на шеќер е поврзана со астма, кариес и обезност, како и факторите на ризик од срцеви заболувања како што се високи холестерол и висок крвен притисок, посочуваат авторите на студијата. Иако не постои значајна разлика помеѓу природните шеќери и оние што се додаваат во преработената храна, истражувачите велат дека додадените шеќери се сметаат за штетни бидејќи “тие често не се придружени со други нутритивни придобивки кои се добиваат од јадење храна која природно содржи шеќер, како што се влакна. и витамини содржани во јаболкото“.
“Најлесен начин да ги намалите додадените шеќери во вашата исхрана и исхраната на вашите деца е да изберете храна за која знаете дека не содржи додадени шеќери, како свежо овошје и зеленчук“, потеницра Херик.
