Пролетта е периодот кога многумина веќе почнуваат да „шмркаат“ поради сезонските алергии. Знаеме дека и децата можат да имаат сезонски алергии, но кога најрано може да се појават, т.е дали бебињата и многу малите деца можат да ги имаат? Еве го одговорот на тоа прашање.
Алергија кај бебиња и мали деца
Не е невозможно, но малку е веројатно дека бебе или дете од возраст во градинка ќе развијат сезонски алергии. Иако сезонските алергии се вообичаени (според Центарот за контрола и превенција на болести, тие погодуваат 19% од децата), тие ретко се развиваат пред двегодишна возраст. Тоа е затоа што обично е потребно многу изложување на овие алергени со текот на времето пред организмот на детето да реагира на нив.
Сезонските алергии вклучуваат и алергии на честички во воздухот како полен или мувла. Овој тип на алергија се јавува во период од годината кога цветаат одредени видови дрвја, треви или коров или кога мувлата ги ослободува своите спори во воздухот. Поленот од дрвјата е најактивен во пролет, поленот од тревата до крајот на пролетта до летото, а поленот од коровот (особено амброзијата) од крајот на летото до есента.
Кога алергично дете или возрасен вдишува полен или спори на мувла, неговиот организам тоа го препознава како „непријател“ и реагира со ослободување на хистамин и други хемикалии. Носот и дишните патишта се воспалуваат и се развиваат симптоми на поленска треска.
Сезонските алергии може да се појават на речиси секоја возраст, но обично започнуваат пред 10-тата година (најчесто на возраст од две до пет години) и го достигнуваат врвот во раните дваесетти години. Понекогаш симптомите исчезнуваат во зрелоста, но не секогаш.
Ако бебе или мало дете има симптоми за кои мислите дека може да се предизвикани од сезонски алергии, размислете за други можни причини, како што е настинка. Исто така, една од причините може да биде алергија, но други видови, односно не сезонски – на некоја храна, на грини, животински првут, некои лекови, хемикалии и слично.
Симптоми на сезонски алергии кај децата
Некои од симптомите на сезонските алергии кои се појавуваат вклучуваат:
- Затнат нос, течење на носот, чешање на носот
- Кивање
- Чешање во грлото
- Триење на очите и/или носот
- Солзење на очи, црвени, подуени очи
- Темни кругови под очите
- Чешање во ушите
- Дишење преку уста (бидејќи носот е затнат)
- Сува кашлица
- Главоболка
- Чешање на кожата
Доколку се сомневате дека вашето дете има сезонска алергија, најдобро е да се консултирате со педијатар, кој доколку е потребно ќе ве упати на дополнително тестирање за да се утврди што точно е во прашање.
