Има се повеќе жени кои остануваат бремени по 35-тата година од животот, а понекогаш овие бремености се нарекуваат геријатриски бремености. Постојат бројни причини зошто идните мајки раѓаат деца тогаш – многу често тоа не е нивен избор, а она што е важно е дека во повеќето случаи од овие бремености се раѓаат здрави бебиња.
Сепак, постојат и некои ризици, а еве што треба да знаете за тоа.
Ризици од бременост по 35. година
Факт е дека проблемите во бременоста можат да настанат без оглед на тоа колку години има идната мајка. Иако жените и по 35. година можат да имаат сосема нормална бременост и да родат здраво дете, кај овие бремености во „подоцнежните години“ има поголеми ризици за одредени проблеми:
- Висок крвен притисок, што може да доведе до прееклампсија
- Гестациски дијабетес
- Спонтан абортус или раѓање на мртво дете
- Компликации при породување поради кои раѓањето на детето мора да заврши со царски рез
- Предвремено породување
- Ниска родилна тежина
- Хромозомски нарушувања кај бебето, како што е Даунов синдром
Факт е дека кога ќе се роди девојче, се раѓа со одреден број јајце клетки, кои подоцна се ослободуваат со секоја менструација. Како што старее жената, бројот на јајце клетки се намалува, а ризиците од хромозомски нарушувања во преостанатите јајце клетки се зголемуваат, пишува webmd.com. Поради ова, се зголемува и ризикот од некои аномалии кај бебињата на постари мајки.
Исто така, ризикот од разни хронични здравствени проблеми се зголемува како што старее жената, а сето тоа потенцијално може да влијае на бременоста.
Покрај тоа, шансите за зачнување близнаци или повеќеплодна бременост се поголеми кај постарите идни мајки, што исто така го зголемува ризикот од некои компликации. Хормоналните промени кои се случуваат во телото како што старее жената ги зголемуваат шансите за ослободување на повеќе од една јајце клетка во текот на циклусот.
Предности на бременоста по 35.
Иако, од една страна, бременоста по 35. е некако потешка и поризична, студиите исто така покажуваат дека има некои предности кога жените на таа возраст остануваат трудни:
- До таа возраст, жените обично се подобро образовани, заработуваат повеќе и затоа имаат повеќе ресурси за издржување на своите деца отколку помладите.
- Мајките кои подоцна раѓаат имаат поголеми шанси да живеат подолго.
- Децата на постарите мајки можат да бидат и поздрави, поприлагодливи и подобро образовани.
