Светската здравствена организација (СЗО) предупреди дека индустриската храна за бебиња често содржи премногу шеќер и дека етикетите често се конфузни, предлагајќи обнова на критериумите поради подобрување на исхраната на најмладите.
“Во околу половина од испитаните производи, над 30% од калориите произлегуваат од чист шеќер и околу една треина од производите содржат шеќер или други засладувачи“, соопштија од европскиот огранок на Светската здравствена организација.
Наодите се донесени на основа на испитани 8.000 производи во повеќе од 500 продавници помеѓу Виена, Софија, Будимпешта и Хаифа, од ноември 2017 до јануари 2018 година.
Зголемената содржина на шеќер може да го зголеми ризикот од претерана тежина или кариес, а раното изложување на зашеќерени производи создава склоност кон слатка храна подоцна во животот, наведува СЗО.
“Добрата исхрана во неонаталниот период и во раното детство е клучна за обезбедување на оптимален раст и развој на детето, и најдобри здравствени резултати подоцна во животот“, изјавила регионалната директорка на СЗО за Европа, Сузана Јакоб.
Консумирањето на слатки напитоци, вклучувајќи овошни сокови може да доведе до тенденција да се напуштат прехрамбените производи богати со нутириенти. Околу една третина од испитаните производи содржеле шеќер, концентрирани овошни сокови или други засладувачи кои не би требало да се додаваат во храната наменета за најмладите. Помеѓу 18 и 57% од тие производи имаатнад 30% калории кои потекнуваат од шеќерите, наведува СЗО.
Студијата исто така покажала дека прехранбените производи кои се сметаат за несоодветни според препораките на Организацијата, се продаваат за најмладите.
Помеѓу 38 и 60% од производите означено е дека одговараат за бебиња помлади од шест месеци, додека СЗО препорачува да бебињата се хранат исклучиво со мајчино млеко во овој период, и според тоа ниту еден производ не треба да биде претставен дека одговара за деца помлади од шест месеци, се наведува во извештајот.
За да ги охрабри своите членки да усвојат нови насоки, СЗО ги ажурирала препораките.
СЗО препорачува храната за деца постари од шест месеци до две години да се заснова на производи богати со хранливи материи и да биде подготвена дома. Сите додадени шеќери и засладувачи треба да биат исфрлени од храната за бебиња. На етикетите на слатките пијалоци, особено овошните сокови и концентрираното млеко, и на слатките, треба да стои дека производот не одговара за деца помлади од 3 години.
