Првата прегратка меѓу мајката и бебето, контактот кожа на кожа, е основен чекор што лекарите го препорачуваат бидејќи ја пренесува мајчината топлина и заштитните бактерии на новороденчето. Светската здравствена организација овој прв контакт дури го нарекува „прегратка што спасува живот“.
Но, контактот кожа на кожа – било да станува збор за прегратка, држење во раце или кој било друг израз на физичка приврзаност – останува од животно значење не само во првите денови, туку и во текот на целото детство, па и подоцна.
„Поголема самодоверба, подобра комуникација меѓу родителот и детето и помалку психички и бихејвиорални проблеми – сето тоа е поврзано со топлината и приврзаноста во односот родител-дете“, вели Кристофер Бергланд од Чајлд Трендс, непрофитна истражувачка организација.
Нивните извештаи покажуваат дека 90% од родителите на деца помлади од три години ги гушкаат своите малечки секој ден. Сепак, изразувањето нежност се намалува како што децата растат – само 74% од мајките и 50% од татковците ги гушкаат своите деца постари од 10 години.
Токму затоа, истражувачите решиле да соберат докази што покажуваат дека навиката на гушкање е корисна во секоја возраст. „Научните истражувања се секогаш добра потврда колку е важно да практикуваме љубов и добрина и да ја покажуваме љубовта кон оние што ги сакаме“, објаснува Бергланд.
Какво влијание има родителската приврзаност врз детето?
- Му помага на детето да чувствува помалку стрес
Дали чувствувате како стресот и исцрпеноста исчезнуваат кога по долг работен ден ќе влезете дома и ќе ги прегрнете вашите деца? Истото го чувствуваат и тие.
Истражување спроведено на Универзитетот Калифорнија покажало дека топлината и нежноста на родителите го штитат детето од штетните последици на токсичниот стрес во детството. Од друга страна, занемарувањето и намаленото покажување приврзаност може долгорочно да влијаат врз физичкото и менталното здравје, оставајќи последици и во зрелата возраст.
- Нежноста во играта му помага на детето да се чувствува сакано
Истражување од 2013 година ги следело мајките и децата за време на игра. Откриено било дека мајките кои покажувале повеќе топлина, охрабрувале слобода и чувство на сигурност, имале посилна поврзаност со своите деца.
Од друга страна, децата чии родители премногу ја контролирале и насочувале играта покажувале понегативни чувства кон мајките.
Експертите нагласуваат дека без разлика на културата, децата имаат потреба да се чувствуваат сакани. Дури и кога родителот има потреба да контролира одредени ситуации, ако тоа го прави со топлина и грижа, детето најчесто го доживува како израз на љубов и заштита.
- Помага детето да порасне во среќна и психички стабилна личност
Топлината на прегратките може да остави трајни позитивни последици. Во истражување спроведено на Универзитетот Нотердам, повеќе од 600 лица биле испрашувани за начинот на кој биле воспитувани.
Резултатите покажале дека лицата кои примале многу нежност во детството имале помалку симптоми на депресија и анксиозност и биле посочувствителни кон другите. Оние што примале помалку нежност почесто се соочувале со психички тешкотии, се чувствувале понесигурно во социјални ситуации и потешко се поврзувале со другите.
Затоа, мајки и татковци – не штедете на прегратки. Секоја прегратка и бакнеж значат многу повеќе отколку што можеби мислите.
