Анализа на 22 студии покажала дека доенчињата кои прекумерно плачат и имаат проблеми со хранењето и спиењето се изложени на поголем ризик да развијат сериозни проблеми во однесувањето во детството.
Имено, се покажало дека секое петто новороденче има симптоми кои може да укажуваат на подоцнежен развој на нарушувања со вниманието со хиперактивност (АДХД).
Покрај АДХД, постои и зголемен ризик и од развој на анксиозност, депресија и агресивно однесување.
Научниците истакнуваат дека плачењето на доенчињата е нормална појава, но доколку се работи за прекумерно плачење на дете постаро од 3 месеци кое не е поврзано со бебешки грчеви, а доколку покрај прекумерното плачење детето има проблеми и со хранењето и спиење, тогаш треба да се обрне внимание за да се спречат евентуални проблеми во детството.
Но, исто така предупредуваат и дека се потребни дополнителни истражувања и дека родителите не треба да бидат претерано загрижени за резултатите од оваа анализа.
Инфантилните колики (грчеви) се напади на плачење и раздразливост кај доенчињата, обично во исто време од денот или ноќта и траат со часови без очигледна причина. Се појавуваат помеѓу 2-та недела и 4-от месец од животот.
Прекумерното плачење може да предизвика аерофагија, што доведува до надуеност и проширување на абдоменот.
Извор: Archives of Disease in Childhood
