Според педијатрите, децата на нокшир се навикнуваат да седат помеѓу втората и третата година. Но, има и такви кои почнуваат месеци порано, а некои со пелени се и до четвсрата година.
Она што е важно е да ги следите знаците кои детето ви ги испраќа и значат дека е подготвено да не користи пелени.
РЕАКЦИЈА НА ПЕЛЕНИТЕ
Како детето станува посвесно за тоа како функционира неговото тело, ќе дава и до знаење дека му треба промена на пелената, било со покажување, било зборувајќи дека извршило нужда. Тоа веројатно многу брзо ќе стане фрустирано и ќе му биде непријатно по нуждата, а можеби ќе се обиде и само да ја извади пелената. Можеби ќе ви биде чудно и непријатно, но можете да му помогнете на детето, така што ќе направите поврзаност со нокширот, дозволувајќи му да биде во тоалетот со вас, додека вие го користите.
ПРОМЕНА НА ОДНЕСУВАЊЕТО
Кога детето ќе почне да стекнува контрола над работата на своето тело, прво што ќе забележите е дека бројот на валкани пелени ќе се намали. Тоа е зелено светло да почнете со навикнување на нокшир или ве-це шолја. Во тој период, децата често можат да одат на некое место во домот, каде сакаат да бидат сами. Не е исклучено дека ќе го затекнете своето дете како клечи во ќош или е само во својата соба, непосредно пред да изврши нужда во пелената. Забележете кога детето нелагодно се движи и нежно упатете го да седне на нокшир и да види што ќе се случува.
НЕЗАВИСНОСТ
Кога децата стануваат самостојни, сакаат се да прават сами, а тоа вклучува и извршување на нужда. Оваа промена во однесувањето на детето е очигледна. Детето ќе викне: Јас сакам тоа да го направам“ и ќе одбива ваша помош при облекувањето пижами или други активности. Тоа се знаци дека детето е подготвено за навикнување на нокшир.
