Родителите често воочуваат дека разговорите со децата во некој момент, одат во погрешна насока. Мало несогласување се претвора во вистинска борба. Што се случило?
Вилијам Стиксруд и Нед Џонсон се коавтори на книгата „Самоуправувано дете“. Заедно, тие работеле вкупно 65 години на истражувања и собрале значително искуство во работа со деца. Утврдиле дека постојат четири фрази кои ги изговараат добронамерните родители, а кои воопшто не функционираат во подучувањето на самодисциплина.
„Ако не работиш напорно сега, ќе жалиш до крајот на животот“
Внесувањето страв е еден од најмалку ефикасните начини за поттикнување внатрешна мотивација кај децата. Всушност, тоа може да биде штетно за децата, на кои фразата им предизвикува стрес.
Уште една причина зошто овие фрази не функционираат е тоа што нивниот контекст не е разбирлив за децата. Децата не се способни да размислуваат однапред како возрасните. Тоа ги прави деца.
Наместо тоа, успешните родители користат фрази како: „Сè уште не си совладал (нешто), но можеш да станеш подобар. Погледни колку далеку веќе си стигнал“, „Да, да се прави (нешто) е тешко, но ако продолжиш да вежбаш, ќе имаш повеќе самодоверба и ќе можеш да се соочиш со идните предизвици и ќе се чувствуваш многу добро“.
„Мојата работа е да те чувам“
Како што растат децата, не можеме да ги заштитиме толку успешно како кога биле мали. Кога ќе почнат со средно училиште, ние не сме постојано со нив и не можеме да го следиме секој нивни чекор.
Кога децата мислат дека наша работа е да ги чуваме, а не нивна, поверојатно е да постапат непромислено, мислејќи дека секогаш постои заштитна мрежа,а всушност не постои.
Наместо таа фраза, успешните родители им дозволуваат на своите деца да прават грешки и сами да научат тешки лекции, а потоа разговараат со нив за тоа и ги предупредуваат на опасностите.
„Те казнувам затоа што треба да научиш дека ваквото однесување е неприфатливо“
Кога го казнувате вашето дете, можеби се чувствувате дека имате контрола, но истражувањата покажуваат дека тоа му штети на вашиот однос со вашето дете и е неефикасна алатка за менување на однесувањето.
Освен тоа, колку повеќе се закануваат родителите, толку повеќе децата лажат и кријат проблеми околу кои можеби ќе им треба помош.
Ако децата не сакаат да го слушнат вашето мислење, не го наметнувајте. Целта е да се научи детето, а тоа се случува само кога навистина слуша. Ако комуницирате со почит, поголема е веројатноста вашето дете само да дојде во одреден момент. Разговарајте со детето за последиците и погрижете се двете страни да се согласат со нив. Бидете конкретни и разумни.
„Премногу време поминуваш на телефон“
Светот на нашите деца изгледа многу поразлично од нашиот и со оваа изјава покажуваме дека не го почитуваме. Социјалните медиуми се многу важни денес.
Успешните родители, наместо да ја користат таа фраза, ќе покажат интерес за она што го интересира нивното дете. Прашајте го вашето дете за игрите што ги игра, луѓето што ги следи, сериите што ги гледа или книгите што ги чита и, барем повремено, уживајте со нив.
