ПИШУВА:
Прим. д-р Љиљана Којиќ
педијатар
♦♦♦♦♦♦♦
Продолжение на првиот дел од текстот посветен на кашлица:
Кашлицата е симптом кој трае долго
Да се вратиме на почеток:
Дишните патишта се обложени со лигавица.
⇒ Што е лигавица?
Еден вид на слузава (лигава) кожа, со која се обложени внатрешните органи, па и органите за дишење. Таа има способност да лачи слуз. Оваа слуз се ствара во поголеми количини при настинка или воспаление. Поради силата на гравитацијата-таа слуз ќе се слева надолу.
⇒ Што е секрет од дишните патишта (или она што во народот е познато како „шлајм“)?
Тоа е сето она што го излачиле клетките на лигавицата на дишните патишта – слуз. Но, неретко таа слуз е помешана и со некои други елементи – изумрени бели крвни зрнца, кои тука „загинале“ бранејќи го респираторниот тракт, по нешто изумрени клетки од лигавицата, кои слично на кожните клетки се одлупуваат по некое време, особено ако биле воспалени.
Кашлицата во најголем број случаи е знак на воспаление на горните дишни патишта (грло, ждрело, нос или синуси) и тоа воспаление, кај малите деца е најчесто вирусно
Важно: Малите деца под 5 години, а особено бебињата, не умеат да издуваат нос, ниту пак, умеат да искашлаат сами. Затоа на овие деца мораме редовно да им го чистиме растеченото носе, и да им помогнеме секретот кој им се собира во долните дишни патишта да се евакуира, односно да се исфрли надвор (испирање на нос, аспирација, инхалација и дренажа со физикална терапија-тапкање).
Кога кашлицата алармира на посериозен проблем?
Во сите случаи кога постои сомнеж за ширење на инфекцијата на пониските делови од дишниот систем, а тоа е:
-
Кога детето е бебе помало од 3 месеци, особено новородено;
-
Кога е придружена со малаксаност и замор;
-
Кога е придружена со потешкотии во дишењето: плитко и забрзано дишење и вовлекување помеѓу ребрата;
-
Кога детето се напрега за да дише;
-
Кога издишува долго и притоа се напрега;
-
Кога има пискот и свиреж во градите;
-
Кога кашлицата е придружена со многу висока температура;
-
Кога е придружена со болка и детето се жали дека го боли во пределот на белите дробови;
-
Кога трае подолго од 4 недели.
Кашлица која трае подолго од 6 недели се нарекува „продолжена кашлица“ и треба да биде испитувана и иследувана од страна на субспецијалист по детска пулмологија.
Малите деца под 5 години, а особено бебињата, не умеат да издуваат нос, ниту пак, умеат да искашлаат сами. Затоа на овие деца мораме редовно да им го чистиме растеченото носе, и да им помогнеме секретот кој им се собира во долните дишни патишта да се евакуира, односно да се исфрли надвор (испирање на нос, аспирација, инхалација и дренажа со физикална терапија-тапкање)
Која кашлица не треба да нè загрижува и како да му помогнеме на дете што кашла?
Помогнете му на тој начин што редовно ќе му го чистите носот, повремено ќе го инхалирате со солен раствор, а потоа ќе го истапкате по грбот, за да може полесно насобраниот секрет да излезе надвор од дишните патишта и набљудувајте го внимателно за евентуална појава на некои од овие девет претходно опишани знаци.
Ако нема ниеден од нив, независно што детето кашла повеќе од 10 дена (иако тоа вам ви се чини како бескрајно долго), и ако детето е динамично, живо, нема температура, добро е расположено и разиграно – нема причина за загриженост, па дури и ако интензивно кашла.
◊◊◊◊◊◊◊
