Новото истражување од Италија носи охрабрувачки податоци! Сè уште не знаеме колку трае имунитетот по вакцинација против COVID-19, но сигурно знаеме дека оние кои ја прележале инфекцијата се заштитени, имуни помеѓу девет и 10 месеци, изјави познатиот италијански вирусолог Андреа Крисанти, пренесува „Танјуг“.
Имунитетот на оние кои ја прележале инфекцијата трае најмалку девет месеци, а многу е веројатно и подолго
Според негови зборови, овој податок е добиен во истражување спроведено меѓу жителите на општината во регионот Венето, каде што на 21 март минатата година беше идентификуван првиот случај на инфекција со COVID-19 во Италија.
Професорот Крисанти вели дека откриле дека луѓето кои ja прележале инфекцијата во првиот бран на пандемијата, а потоа биле во контакт со заразени лица кои се разболеле во вториот бран, не само што не се заразиле, туку било откриено дека кај нив се развиле дури и повеќе антитела.
„Значи, имунитетот на оние кои ја прележале инфекцијата трае најмалку девет месеци, а многу е веројатно и подолго“, заклучи Крисанти.
Професорот Андреа Крисанти стана познат по својата антиковид стратегија, која беше спроведена во општина Венето. Тој предложи, и тоа беше направено, да се изврши масовно тестирање на популацијата, а не да се чека да се појават првите симптоми на инфекцијата. Благодарение на тоа, Венето имаше релативно мал број на заразени и починати во првиот бран на пандемијата во споредба со другите италијански региони.
