Вака ќе биде уште неколку месеци. Кон крајот на годината или почетокот на наредната би требало да има вакцина. По вакцинацијата, потребно е уште малку време за да утврдиме колку е ефикасна, може да биде ефикасна во процент од 60% па луѓето да треба да се вакцинираат двапати или трипати, но нема потреба од депресија и паника, и ова ќе помине
„Вирусот е ист од почетокот, од декември минатата година до денес, и останува да биде опасен, како што беше во Италија. Околу 10% од луѓето имаат тешка инфекција и неколку проценти на луѓе насекаде во светот умираат. Се шири многу брзо, особено кога станува збор за асимптоматските пациенти. Во почетокот, околу 90% од пациентите беа постари од 70 години и стапката на смртност беше далеку поголема бидејќи овие луѓе се хронично болни. Но, после карантинот кога успеавме да го забавиме ширењето на вирусот, сега вирусот е меѓу младите, што е логично затоа што тие се движат и се дружат повеќе. Процентуално, сега има повеќе случаи кај младите луѓе. Вирусот не се сменил, туку се шири во друга популација. Мора да носиме маски во сите затворени простори или да бидеме на дистанца“, изјави проф. д-р Андреј Трампуж, специјалист за заразни болести од болницата „Charite“ во Берлин, а кој по потекло е од Словенија, во емисија на К1 телевизија, пренесуваат српските медиуми.
Тој истакна дека единствениот начин да се заштитиме од коронавирусот, сè додека не се најде вакцина, е да носиме маска и да одржуваме социјална дистанца.
Вирусот се шири преку капки и воздух
„Не знам зошто Светската здравствена организација не го кажа тоа од почетокот, затоа што знаеме дека е така уште од епидемијата на SARS и MERS. Вирусот се шири низ воздухот во затворени простори и затоа е многу важно да се носат маски. Тие спречуваат до 90 проценти од аеросолните честички. Ако ги носевме од јануари, можевме да ја спречиме пандемијата.
Колективен имунитет на овој вирус не постои
Д-р Трампуж, исто така, потенцира дека не станува збор за колективен имунитет и дека мора да живееме со почитување на мерките сè додека не се појави вакцината, како и дека мора да се тестираме кога ќе почувствуваме симптоми или кога ќе откриеме дека сме биле во контакт со некој кој е заразен.
Процентуално, сега има повеќе случаи кај младите луѓе. Вирусот не се сменил, туку се шири во друга популација. Единствениот начин да се заштитиме од коронавирусот се додека не се најде вакцина, е да носиме маска и да одржуваме социјална дистанца
„Луѓето со симптоми во себе носат поголема количина на вирусот, но и асимптоматските луѓе можат и тоа како да го пренесат. Никогаш нема да имаме колективен имунитет затоа што сега е инфициран само еден до два проценти од целата популација. За колективен имунитет потребно е помеѓу 70 и 80 проценти заразени. Тоа е можно само ако не преземаме ништо, но тогаш би имале милиони смртни случаи. Единствена можност за враќање во потполна нормала е вакцината“.
Имунитетот на вирусот не исчезнува
Антибиотиците, како што вели д-р Трампуж, немаат никаков ефект врз вирусот, но кај тешките случаи кога покрај вирусната имаме и бактериска инфекција, тогаш се потребни антибиотици.
„Пациентите со потешка клиничка слика имаат повеќе антитела по надминување на вирусот, додека оние со послаби симптоми имаат помалку антитела и по три месеци тие исчезнуваат. Сепак, тоа не значи дека тие не се имуни на вирусот. Имуни се, само што не постои тест кој може да ги измери Т-лимфоцитите, кои исто така се носители на имунитетот. Тоа е уште еден механизам за заштита од вируси кој сите честопати го превидуваат“.
Слободно може да одите на базен
„Базените и водата не се опасни, затоа што вирусот се пренесува преку воздухот, кога кашлате, пеете, разговарате. Дезинфицирајте ги и мијте ги рацете, а и базените и другите површини се дезинфицираат така што нема потреба да стравувате. Бидете надвор, читајте книги, гледајте филмови – вака ќе биде уште неколку месеци. Нема да има пауза, но вториот бран нема да биде полош од првиот затоа што го знаеме вирусот многу подобро и подобро сме подготвени. Кон крајот на годината или почетокот на наредната би требало да има вакцина. По вакцинацијата, потребно е уште малку време за да утврдиме колку е ефикасна, може да биде ефикасна во процент од 60% па луѓето да треба да се вакцинираат двапати или трипати, но нема потреба од депресија и паника, и ова ќе помине. Сепак, оваа година е најдобро да го прескокнете одморот. Колку помалку контакти и движење – толку подобро за сите. Па следната година можете да земете два годишни одмори“, советува проф. д-р Андреј Трампуж, експерт за заразни болести.
