Телото за време на бременоста минува низ многу промени оддеднаш, што понекогаш е тешко да се знае што е нормално и очекувано, а што загрижувачко.
Сукрвица или крварење
Повремено оскудно вагинално крварење не е невообичаено за време на бременоста, но овој симптом никако не треба да се игнорира. Информирајте го својот гинеколог дури и за најмало крварење. Благото краткотрајно крварење е можно по сексуален однос или гинеколошки преглед при кој се користела сонда. Не е загрижувачко бидејќи вообичаено укажува на природни промени во грлото на матката, односно на неговата чувствителност. Може да се јави и во периодот кога треба да добиете месечен циклус. Доколку крварњето потрае, или е проследено со болка од стомакот и станува обилно треба веднаш да се јавите кај гинеколог. Тоа може да бидат знаци за можно пометнување, вонматерична бременост или проблеми со постелката
Екстремно повраќање
Постојаното празнење на желудникот тешко се поднесува. Иако многу идни мајки имаат проблем со повраќаање, во првите три месеци од бременоста, а некои во текот на целата бременост имаат нагласена чувствителност на храна, мачнини, гадење и повраќање. Hyperemesis gravidarium е медицински термин за прекумерно повраќање во бременоста. Оваа состојба доведува до дехидрација, малаксалост и намалување на телесната тежина. Во некои случаи потребна е кратка хоспитализација, за да може телото на трудницата да се опорави.
Исцедок
Засилениот вагинален исцедок во бременоста може да биде многу непријатен, но не е причина за грижа, бидејќи на тоа влијаат хормоните и зголемената крв во гениталиите. Но, стручна помош треба да се побара доколку се јави белузлав исцедок кој предизвикува чешање или печење, што укажува на габична инфекција. Но, доколку забележите тенок млаз на бистра течност која истекува од вагината (константно слабо истекување) или ако дојде до засилено излевање на плодовата вода, веднаш отидете на гинеколог бидејќи тоа е можен сигнал за почеток на породувањето.
Силна главоболка
Доколку претходно не сте имале главоболки, а се појавиле во бременоста, или ако станат тешки и чести, задолжително консултирајте го својот гинеколог. На крајот на бременоста, силната главоболка која долго трае, особено ако е проследена со пречки во видот (замаглен вид, светки пред очите, дупла слика), несвестица, болка во горниот дел на стомакот, отекување на лицето или рацете – може да укажува на прееклампсија, состојба опасна и за мајката и за плодот.
