Емоционалното занемарување во детството се случува кога родителите, свесно или несвесно, ги занемаруваат емоциите и емоционалните потреби на детето. Според Psychology Today, ова првенствено се однесува на родителите кои не забележуваат што чувствува нивното дете, никогаш не го прашуваат за неговите чувства, не се поврзуваат со него на емоционално ниво, ниту доволно ги потврдуваат неговите чувства.
Студиите покажале дека емоционалното занемарување во семејството доведува до бројни штетни последици за детето, како што се послаб успех во училиште, проблеми во односите со другите луѓе, склоност кон депресија и анксиозност и губење на интерес за активности и хоби во кои детето некогаш уживало.
Она што е најголем проблем е фактот што, за разлика од физичкото малтретирање или занемарување, емоционалното запоставување не е лесно да се забележи. Но, психолозите тврдат дека речиси кај секое дете кое било емоционално занемарено на било кој начин постои еден знак, а тој се однесува на покажувањето емоции.
Имено, дете кое е емоционално занемарено во домот, ќе има проблеми со изразување на своите емоции бидејќи неговите родители, најчесто несвесно, преку воспитувањето го убедиле дека неговите чувства не се ниту важни ниту валидни. Таквите деца, објаснуваат психолозите, често се повлечени, ладни и незаинтересирани.
