Веројатно ниту еден родител свесно не одлучува да биде токсичен, но некои попатно стануваат такви. Токсичната врска помеѓу родителите и децата може да влијае на менталната благосостојба на децата и да доведе до тоа да се јави траума кај нив, но и долготрајни ментални проблеми.
Што е токсично родителство
Емоционално здравите родители ги разбираат чувствата на своите наследници, ги поттикнуваат да ги следат нивните соништа, знаат да се извинат кога ќе згрешат и проблемите ги решаваат со здрава комуникација. Од друга страна, во токсичните семејства, родителите ги критикуваат, ги контролираат децата, често ги занемаруваат потребите на нивните деца и генерално имаат штетно однесување кое може да стане многу деструктивно.
Кога децата растат со родители со кои постојано трпат осуда и критики за нивното однесување, личност, постапки, тоа целосно ги деморализира и им ја уништува самодовербата. Токсични родители секако се оние кои физички или психички ги малтретираат децата на кој било начин.
Знаци дека сте токсичен родител
Свесноста за токсичноста, односно однесувањето кое е лошо за децата, признавањето дека таквото однесување е неприфатливо, е првиот чекор кон надминување на овој проблем.
Еве кое однесување е типично за токсичните родители – погледнете дали ќе се пронајдете.
1. Егоцентрично однесување
Некои родители се постојано фокусирани на себе, недостапни за децата, себични и не се грижат за потребите на најмалите. Тие не се физички и психички поврзани со своите наследници, одбиваат да ги разберат чувствата на другите.
2. Емоционална реактивност
Токсичните родители не можат да ги контролираат своите емоции, што доведува до емоционални испади и непредвидливо однесување. Често реагираат премногу бурно и стануваат драматични.
3. Премногу контрола
Токсичните родители одбиваат да ги гледаат своите деца како возрасни кои имаат свои личности и можат сами да донесуваат одлуки. Наместо тоа, тие ги контролираат своите деца или со пари или со вина. Тие ја нарушуваат приватноста на нивните наследници со читање на нивните пораки, наметнување совети кои никој не ги побарал, како и преземајќи некои чекори кои влијаат на животот на децата, без да се консултираат со нив за тоа.
4. Преголеми барања
Родителите кои премногу бараат, очекуваат нивните деца да ги занемарат сите нивни обврски, за да задоволат некои од потребите на мама или тато. Тие постојано користат закани или преку манипулации бараат внимание од нивните наследници.
5. Емоционална злоупотреба
Суровите шеги, како и непримерните коментари упатени до партнерот пред децата ги прават да се чувствуваат многу засрамено. Исто така, родителите кои зборуваат за парични проблеми пред своите деца, се расправаат, може да се класифицираат како токсични.
6. Манипулација
Токсичните родители можат да бидат многу манипулативни, да ја извртуваат вистината за да се претстават во добро светло. Тие користат вина, негирање или тривијализирање за да ја постигнат својата цел.
7. Непотребни дискусии пред деца
Се разбира, понекогаш има расправии меѓу партнерите, но поентата е дека тие расправии треба да бидат приватни, а не да се играат пред децата. Врескањето и викањето им испраќаат на децата сосема погрешни пораки за тоа како да ги решат конфликтите.
8. Постојана критика
Токсичниот родител никогаш не е задоволен со ништо што детето го прави, со кое било од неговите достигнувања. Секогаш за сè го обвинува детето, му укажува на неговите маани, го задева и намерно изнесува теми за кои знае дека може да го повредат.
9. Третирање на дете како возрасен
Кога во семејствата нема јасно дефинирани граници, тогаш улогите на неговите членови се нејасни. Токсичните родители често им откриваат на децата некои проблеми кои не се соодветни за нивната возраст, пренесуваат работи од кавгата со партнерот, даваат негативни коментари за партнерот…
10. Чување тајна
Токсичните родители одбиваат да го признаат проблемот, но веруваат дека тишината може да избрише некои трауматски ситуации. Тие, исто така, им забрануваат на децата да зборуваат за тоа, а вината ја префрлаат на нивните врсници, други луѓе од околината или зборуваат за тоа како фаза во развојот.
