Првиот оброк по породувањето треба да биде лесен, хранлив, но би очекувале и вкусен по сите маки што останале зад новопечените мајки. Но, кај нас трудниците често објавуваат незадоволни слики на Фејсбук каде се потсмеваат на болничката исхрана. Иако храната во нашите болници не е секогаш репрезентативна, сепак некаде може да се најде поконкретен оброк.
Во светот, пак, преовладуваат малку поинакви обичаи. По породувањето на мајките им се служат традиционални јадења или напивки кои често им се служат на гостите за време на прославата на раѓањето на детето бидејќи симболизираат среќа, плодност и слично. Некои од нив веројатно не би не направиле среќни веднаш по исцрпувачкото раѓање. Еве што им се нуди на родилките на светските менија:
Турција
Додека се уште се во болница, на родилките во Турција им се служи нивниот традиционален црвен пијалак наречен Лохуса Шербети. Пијалакот се состои од вода, шеќер, цимет, каранфилче и црвена прехранбена боја. Се верува дека има позитивен ефект врз производството на мајчиното млеко.
Јапонија
Секихан е традиционално јапонско јадење, па затоа често се користи за прослави за време на доаѓањето на бебето на свет. Бидејќи содржи црвен азуки грав, а Јапонците ја сметаат црвената боја за многу поволна, нема подобар избор за првиот оброк на мајката.
Во превод, Секихан буквално значи црвен ориз, но всушност тоа е традиционален јапонски ориз варен, како што веќе објаснивме, со азуки грав.
Идните мајки со задоволство го јадат и во петтиот месец од бременоста бидејќи се верува дека неговото консумирање во овој период позитивно влијае на растот на плодот.
Холандија
Обичај е во Холандија, кога ќе се роди дете, семејството и пријателите да се почестат со традиционален десерт кој во буквален превод значи „бисквити со глушец“.
Овој десерт е направен од крцкав холандски леб, намачкан со маргарин, а потоа попрскан со шарени топчиња од семки од анасон. Ако се роди момче, топчињата се сини, додека за девојче се избираат розови. Ако пак се роди кралско бебе, тогаш ќе се слави со портокалови бисквити.
Глувчето инаку се смета за симбол на плодноста, а на новите мајки им треба “помош“ во производство на млеко, дигестијата и постпородилни грчеви.
Јужна Кореја
Myeok Guk е традиционално јужнокорејско јадење за новопечените мајки. Тие веруваат дека оваа хранлива супа, направена од алги и преполна со хранливи материи, е идеална за закрепнување на организам кој доживеал породување.
Супата е богата и со калциум, па идните мајки не само што ја консумираат како прв оброк, туку често ја јадат со денови, дури и недели по породувањето.
Либан
Според либанската традиција, новите мајки, како и гостите во домот на роденото бебе, секогаш го наздравуваат со Аинар зачинет чај. Избраните зачини, шеќери од јаткасти плодови му даваат на чајот слатка нота, додека семките од анасон, кои исто така се присутни овде, имаат за цел да им пружат удобност на новите мајки и да им помогнат на нивното тело да се опорави.
Кина
Јајцата се сметаат за симбол на плодноста и животот во Кина, а тврдо варените јајца обоени во традиционалната црвена боја го слават доаѓањето на новиот живот. Црвената боја се поврзува и со среќа и радост, па овие јајца се користат и за прослава кога детето ќе наполни еден месец и други важни настани во животот на детето.
Египет
Во Египет, прославата на раѓањето на детето се нарекува Себу и се одржува една недела по раѓањето. Во оваа прилика, мајката и гостите пијат Могат, топла, густа напивка која наликува на смеса, а се состои од вода, шеќер и билен прав за кој Египјаните верувале дека го стимулира производството на млеко кај родилките.
