Освен ако температурата не е екстремно ниска, под нулата, престојот на отворено им помага на доенчињата да се прилагодат на годишните времиња и деноноќниот циклус, а често ја смирува и нервозата, сметаат педијатрите.
Кога температурата ќе падне под нулата, не треба да го изнесувате бебето, освен за брзи одења до автомобилот. Но, кога температурата е над нулата, потребна е претпазливост бидејќи студениот ветер може да биде штетен за новороденчето. Имено, доенчињата сè уште немаат способност да ја регулираат својата телесна температура, па ограничете ја изложеноста на студени елементи, како што е засилен ветер, сведете ја на неколку минути, а играњето во снегот оставете го додека децата не пораснат малку.
Бебињата губат топлина побрзо од возрасните, а колку се помлади толку потешко се справуваат со настинката. Мало бебе ја нема потребната телесна маса за да се загрее откако неговото тело ќе се олади.
Како на детето да му биде топло и да ужива во прошетка?
- Облечете го бебето во слоеви. Облекувањето на бебето во слоеви ви овозможува да се прилагодите на неговите потреби. Долниот слој може да биде до телото, како хулахопки и боди. Згора на тоа, можете да ставите уште еден слој панталони и блуза со долги ракави. На крајот, облечете јакна, капа, ракавици и топли волнени чорапи за да ги задржите рацете и нозете топли.
- Задолжително соблечете ја јакната на бебето во автомобилот. Зошто? Ако детето носи јакна, мора да ги олабавите сигурносните појаси за да го сместите детето, што влијае на безбедноста на бебето. Алтернативно, можете да користите ќебе, а потоа да го тргнете откако автомобилот ќе се загрее, за детето да не се прегрее.
Проверувајте го бебето. Ако лицето му стане црвено, кожата е топла и е нервозно, веројатно е прегреано. Ако е нервозно и со насолзени очи, а кожата е студена на допир, бебето веројатно не е доволно добро завиткано.- Внимавајте на знаците за предупредување. Ако вашето бебе почне да трепери или неговите екстремитети – рацете, стапалата и лицето – се ладни и црвени или бледи и тврди, веднаш внесете го во затворен простор.
Ако се случи да образите и рацете на вашето бебе се многу ладни, не го тријте ладното место за да го загреете, бидејќи тоа може дополнително да ја оштети кожата. Наместо тоа, нежно загрејте ја кожата со топли крпи, а потоа облечете топла и сува облека. Ако состојбата не се подобри во рок од неколку минути, јавете се кај вашиот лекар.
