Мајките и татковците сакаат да ги заштитат своите деца од се што е лошо и тоа е сосема нормално, но понекогаш родителите малку претеруваат во желбата и ги презаштитуваат децата. Важно е малите понекогаш да имаат можност да сфатат како сами да ги решат проблемите или да ги почувствуваат последиците од своите постапки, вели психијатарот Даниел Ејмен.
Родителите често грешат во тоа што премногу прават наместо нивните деца, што резултира со „ментално слаби деца“, вели Ејмен.
Тоа што, да кажеме, родителите ги прават домашните задачи или училишни проекти наместо децата за да добијат подобра оценка, тоа што им даваат се што сакаат за да избегнат тантруми, го ограничува развојот на ментална отпорност кај децата и развојот на независност, предупредува психијатарот. А децата кои имаат висока ментална отпорност имаат и поголеми шанси да пораснат во среќни, успешни возрасни, покажле истражувањата.
„Кога ќерка ми ќе ја заборави домашната задача, никој не и ја носи на училиште. Ако не ја земе јакната и надвор е ладно, и покрај тоа што мајка ѝ ја предупредила, никој нема да и ја однесе јакната. Исто така, важно е кога детето ќе каже дека му е здодевно, наместо да се обидувате да го промените тоа, вие кажете „Се прашувам што ќе правиш во врска со тоа“, порачува Ејмен.
„Доколку работите премногу наместо вашите деца, тогаш на штета на неговата самодоверба ја градите својата. Менталната сила кај луѓето се развива преку решавање на проблемите“, потенцира психијатарот.
Детскиот психолог Това Клајн истакнува дека градењето на издржливост кај децата не значи дека родителите треба да имаат груб пристап, но нема да помогне ниту заштитата на децата од разочарување.
Наместо тоа, важно е децата да доживеат разочарувања, пречки, да прават грешки и да поминат низ други не толку пријатни ситуации, притоа добивајќи љубов и поддршка од нивните родители.
Клајн истакнува дека на овој начин родителите им испраќаат на децата порака дека веруваат во нив и дека се тука за нив дури и кога работите се тешки.
„Пуштете ги сами да размислуваат за своите проблеми или решенија за проблемите, наместо претерано да се мешате во тоа“, заклучува Ејмен.
