Тантрумите или изливите на бес, кои секое дете ги има во одреден период од неговото растење, често предизвикуваат чувство на беспомошност кај родителите, а една од најдобрите работи што можеме да ја направиме е да размислиме однапред и да ги спречиме пред да се случат, објаснува психологот Товах Клајн. Меѓутоа, доколку сепак дојде до тантрум, таа предупредува на неколку работи што секој родител треба да ги избегнува за да не ја влоши ситуацијата уште повеќе.
Да го оставите детето
Една од најголемите грешки што родителот може да ја направи кога детето има тантрум, е да го игнорира, односно да се оддалечи од детето. Како што објаснува д-р Клајн, оставањето на детето за време на тантрумот е многу застрашувачко искуство за него. „Ако на вознемирено дете му кажете дека го оставате, тоа ќе почне уште повеќе да паничи. Пораката што му ја испраќате е дека не е сакано кога се чувствува лошо и токму во овие моменти детето треба да биде свесно дека родителот е секогаш покрај него“, предупредува.
Да му се смеете
Смеењето кога детето има тантрум е уште една од оние работи што родителите треба да ги избегнуваат, вели психологот. Размислете, дали е навистина правилно да му се смеете во лице на вашето дете? Во време кога детето е возбудено или вознемирено, смеењето на родителите може да го натера да мисли дека неговите чувства се смешни, поради што ќе се чувствува многу лошо. Чувството за хумор е клучно во родителството, но не е препорачливо да се смеете на сметка на вашето дете“, објаснува таа.
Да го имитираат
Исто како и смеењето, имитирањето на детето исто така се смета за исмејување со него и неговите чувства. „Со ваквото однесување, родителите го учат детето дека е во ред да се смее и да се исмејува со другите луѓе, особено оние на кои им е тешко или се чувствуваат лошо поради која било причина. Ова е спротивно на она што ние како родители треба да ги учиме нашите деца, а тоа е да се сложуваме со другите на најдобар можен начин“, објаснува д-р Клајн.
