Децата на две или тригодишна возраст се непредвидливи, понекогаш деструктивни, тврдоглави и со променливо расположение. Во еден момент би сакале да се галат, а веќе во следниот се однесуваат како тинејџери. Токму тоа е причината зошто толку сакаме да ги контролираме. Сакаме да ги избегнеме тантрумите во автомобилот, при облекувањето, на јавно место, но понекогаш е важно едноставно да се дозволи и пушти да направат по нивно.
- Нека се извалкаат
Секој би сакал куќата секогаш да биде уредна и чиста, но не и малите деца. Тие се импулсивни и сакаат да се валкаат затоа што обично така учат за животот. Пуштете ги да се извалкаат ако уживаат во такви активности и дозволете им да ја негуваат својата љубопитност и да истражуваат. Подгответе резервна облека и оставете ги да бидат слободни во нивната игра.
- Нека влезат во ризична игра
Тешко е да му дозволите на детето да истражува поопасни видови игри и во секој момент да не велите застани“ или “внимавај“. Потребата на родителите да го заштити своето дете е голема и може да биде предизвик да се остане смирен во потенцијално опасни ситуации. Но, важно е да ги пуштиме затоа што тоа е добро за нив. Истражувањата покажале дека ризичната игра во раното детство им помага на децата да развијат самодоверба и издржливост, а им помага и да го истражуваат светот околу нив.
- Нека вежба независност
Вежбањето независност се надоградува на ризична игра. Дозволете му на детето да го истражува паркот, отворените и затворените простори и, доколку се работи за безбедни услови, обидете се да не го насочувате или допирате. Ова не значи дека треба да го оставите детето само и без надзор, туку дека понекогаш треба да му дадете повеќе простор да ја оствари својата независност и самостојност. Ова ќе му помогне да изгради самодоверба и вредни социјални вештини.
- Нека вели не
Малите деца се принудени да бидат врзани за автомобилски седишта, да ве држат за рака додека поминувате улица, да носат чевли во трговскиот центар иако повеќе би сакале да бидат боси. Тие го слушаат зборот не толку многу пати во денот и толку пати го контролираат она што го прават, носат и јадат, што сосема јадно дека нивното не не е само одраз на фрустрација и обид да ја вратат контролата во животот која во голема мера е контролирана од возрасни.
Јасно е дека нема да му попуштите на детето ако е во прашање неговата безбедност, но замислете како би ви било вам да добивате забрани по цел ден. Понекогаш почитувајте го детското не. Ако не сака да се капе пред спиење, прашајте го зошто и обидете се да му организирате да се капе наутро по будењето. Дајте му опција и преговарајте така да знае дека неговото мислење е важно.
- Нека изберат сами
Иако ви се стемнува пред очи кога детето сака да излезе во костим за капење среде зима или инсистира да јаде само од одредена чинија што сте ја издвоиле за посебни прилики, попуштите понекогаш. Малите деца силно ќе се борат за она што го сакаат и доколку не го добијат, реакциите можат да бидат силни. Ова не значи дека треба да попуштате на секој детски каприц, туку мудро изберете ги битките што ќе ги водите.
Ако на детето му е важно среде зима да излезе во костим за капење, договорете се. Нека облече костим за капење и зимска облека преку него или нека го облече костимот преку облеката. Понудете му на детето неколку опции и оставете го да почувствува дека учествувало во изборот.
